Eskerrikaskoandereño.com web guneak zuzenean emango du ospakizuna Internetez. Arratsaldeko 19:30tik aurrera hasiko da omenaldia eta emisioa.
Gipuzkoako Urrezko Domina Gipuzkoako Foru Aldundiak ematen duen sari garrantzitsuena da. Urrezko Dominarekin, gizartearen interes orokorren eta Gipuzkoako balioen alde borrokatzen duten pertsonak edota elkarteak saritzen ditu Aldundiak.
Aurtengo saria, 1960ko hamarkadan Gipuzkoako ikastolak martxan jarri zituzten andereñoei emango die Gipuzkoako Foru Aldundiak. Markel Olano Gipuzkoako ahaldun nagusiak adierazi duenez, aitortza horren bitartez andereñoei eskertu nahi izan diegu klandestinitatean hezkuntzari, euskarari eta kulturari emandako bultzada. Olanok nabarmendu du frankismo garaian ikastolak sortzeko haiek izandako “ausardia, konpromisoa eta borondatea”.
Besteak beste, Mikel Laboak (2008), Jose Migel Barandiaranek (1982), Euskaltzaindiak (1994) eta Pedro Migel Etxenikek (2006) jaso dute orain arte Gipuzkoako Urrezko Domina.
∞Informazio gehiago:
- Gipuzkoako Urrezko Domina andereñoei (eskerrikaskoandereño.com)
∞Lotura duten albisteak:
- AUDIOA: "50 urtetik gorakoek ere oraindik andereño deitzen digute" (Euskadi Irratia/eitb.com)
- Eman eta eman eta inoiz hustu ez (zuzeu.com)