Txankakuako perratokia berreskuratu du jaiotza mekanikoak

•Zeru izartsuagoa

Jaiotza inguratzen duen zeruaren atal txiki batean 300 izar jarri zituzten, orain bi urte, Elgojaiotzako artisauek. Oraingoan beste paretean ere jarri dituzte, 750 izar gehiago, hain zuzen. Izar horiek gure unibertsoan aurkitu ditzakegun konstelazioak irudikatzen dituzte: hartza nagusia, hartz txikia eta Drako, adibidez. Dekoratuaren parte diren mendi berrietan egunsentian eguzkia nola esnatzen den eta ilunabarrean nola ezkutatzen den ere ikusi daiteke.

 

•Angula arrantzalea
Mugimendua duten irudi berrien artean erreka ertzean angulak arrantzatzen diharduen arrantzalea nabarmendu behar da. Ohi dutenez detaile guztiak zaindu dituzte, bere bahean angulak baidauzka eta baita iluntasunean ikusteko kriseilua ere.

 

•Txankakuako perratokia
Duela hamarkada batzuk Markinarako bidean zegoen Txankakuako perratokia berreskuratu du Elgojaiotzak. Ez zaio detailerik falta: perratzailearen burdinezko erremintak, eraikinaren egitura eta norberak, bertatik bertara, ezagutzea hobe den beste hainbat xehetasun.

•Arropa berriak
Dekoratuaren erdiko atala ere berria da, perspektiba hobetze aldera, inklinazio pixka bat eman baitiote. Irudi asko zaharberritu dituzte eta arropa berriak dauzkate beste batzuek. Joan zen urtean dantzatzeaz aspertu zen dantzaria berriro martxan jartzea ere lortu dute, mekanismo guztia aldatu ondoren.

Elgojaiotzako kideek eskerrak emanez agurtu zuten jaiotza mekanikoaren inaugurazioa. “Parrokia eta Udala eskertu nahi ditugu, baita proiektu hau aurrera eramaten laguntzen duten pertsona eta erakunde oro ere. Eta nola ez, urtero bisitan etortzen zaizkigun herritarrak eta atzerritarrak”.

Jaiotza ikusteko ordutegia:

• Astelehenetik ostiralera 17:30-20:30; zapatu eta jaiegunak 10:30-13:30 eta 17:30-20:30.