Luperiak azpian harrapatu zuen furgonetako gidaria onik dago

elgoibarren.net 2010ko ots. 10a, 13:29
Deskargatu Info Ahotsak :


Danobatera eta Mendaroko Hospitalera fruta garraiatzen zuen furgoneta bat azpian harrapatu zuen luperiak, atzo, A-8 autopistan, Elgoibar parean. Gidariak gainean erori zitzaizkion harri eta basari izkin egiten saiatu zen arren, ibilgailuaren kontrola galdu eta hainbat itzulipurdi egin eta gero bide bazterreko zangan amaitu zuen. Ez dauka zauri larririk eta dagoeneko eman diote alta Mendaroko Hospitalean.

 
 Barne saileko iturriek jakinarazi dutenez, goizeko 9:00ak inguruan gertatu zen istripua, autopistako 69. kilometroan (Irungo noranzkoan), Maltzagatik kilometro eskasera. Gidaria, 45 urteko gasteiztarra, istripua izan zuen furgonetatik irten ezinda geratu zen, hanka bat trabatuta baitzuen. Suhiltzaileen laguntzaz atera zuten eta Mendaroko Hospitalera eraman. Zorionez, eguerdirako alta jaso zuen, ubeldura batzuk gora behera ondo baitago.
  Luperiaren ondorioz harri eta zikinkeri mordoa jauzi ziren autopista gainera eta, Donostiarako noranzkoan bi erreiak moztu behar izan zituzten. Lau kilometrorainoko auto pilaketak sortu ziren zenbait unetan, harik eta autopistako langileak errepide gaineko zikinkeria garbitzen hasi ziren arte.

  • Argazkiak: diariovasco.com agerkari digitalak istripuaren eta luperiaren ondorioak jasotzen dituen argazki-sorta eskegi ditu web gunean.
*Argazkia: Felix Morquecho.
 
∞Lotura duten albisteak:
 
 
 
 
 
Gizartea Elgoibar