“Jon & Sugramas”, Jon Gurrutxagaren proiektu berria martxan

 

 

Abesteko duen grina asetzeko asmoz, Elgoibarko musikaria duela bi urte inguru hasi zen proiektu honetako kantuei forma ematen. Eta kantu sorta bat bildu zuenean taldea osatzea erabaki zuen. Horretarako aspaldiko lagunekin batu da.
Sugearekin lotutako landarean oinarriturik “Sugramas” izenaz bataiatutako bandan Legen Beltzako Ekaitz Garmendia eta Ivan Hernández azpeitiarrak daude gitarra eta baterian eta Andrakan taldean ere diharduen Andoni Mujika elgoibartarra, berriz, baxuan.
  “Jon & Sugramas” proiektuan ingelesez eta euskaraz abestutako rocka izango da nagusi, bluesaren eragina ere nabari da, baina batez ere 70eko hamarkadako rock taldeen eragin zuzena duena.

•Kontzertuak eta diskoaren grabaketa
  Diskoa grabatzen hasi aurretik bi kontzertu eskainiko ditu taldeak motorrak berotzen hasteko, otsailaren 26an lehena Durangoko Izkin tabernan, eta martxoaren 6an bestea Arantzako Aterpean. Bi kontzertu horiek eskaini ostean martxoaren 26an Bilboko Koba estudioetan sartuko dira Xanpe soinu teknikariarekin batera beraien lehen diskoari forma emateko asmoz. Estraineko lana maiatzaren hasieran aurkeztuko dute Gaztelupeko Hotsak diskoetxearen eskutik.