Kiribil gaur arratsaldean itzuliko da Plaza Handira, lagun berriekin

 Kiribil eta bere lagunen saioak 17:30ean hasiko dira, eta eguraldi txarra eginez gero, saioak astebetez atzeratuko dira. Elgoibarko Izarrak zazpigarren urtez antolatu du Kiribilka egitasmoa. 2 eta 6 urteko haurrentzako eta horien familientzako egitasmoa da, eta helburua, berriz, Elgoibarko familietan euskararen presentzia sustatzea da.

 Zatoz jolastera! (Kiribilek idatzitako eskutitza)

 Aupa, lagunak! Kiribil naiz, eta zuekin egoteko jaitsi naiz Karakate inguruan daukadan etxetxotik. Negua gogorra izan da aurten, eta egun asko pasatu ditut kalera jaitsi gabe, baina eguzkiaren berotasuna lagun dudala, desiratzen nago zuekin jolasteko. Jolaserako gogoa daukat , bai , baina arduratuta ere banago. Neguan guraso batek baino gehiagok deitu dit kezkatuta. Kezkatuta daude haien seme-alabek gaztelaniaz berba egiteko joera handia dutelako, euskaraz denek jakin arren. Esan diet umeek haien inguruan entzun eta ikusten dutena egiten dutela, eta Elgoibarren gaztelania nagusi bada, normala dela umeek ere gaztelaniaz berba egitea. Gainera, zergatik arduratzen edo haserretzen gara umeek gaztelaniaz egiten dutenean, gurasook eta gainontzeko helduok gure artean barra-barra gaztelaniaz badihardugu? Euskara ez da umeekin eta txakurrekin hitz egiteko hizkuntza.

 Gure umeak ez dira euskaldunak izango Elgoibarko ikastetxeetan D eredua nagusi delako bakar r ik. Hor i ondo dago,behar rezkoa da, baina umeak euskalduntzeko euskara geletatik kanpora atera behar dugu. Euskara familietan sartu behar da; euskara koadrila eta lagunartera zabaldu behar da. Jakin, gainera, gure umeak euskalduntzeko eredurik eragingarriena F eredua dela: Familien eredua, alegia.

 “Euskara jalgi hadi plazara” zioen Etxeparek, eta horregatik hasi nintzen duela zazpi urte Plaza Handira jaisten. Eta udaberrian jaisten naiz beti, umeen eta gurasoen ahotik euskara zelan loratzen den ikusi nahi dudalako. Beraz, gaur hasi eta ekainaren 18ra arte, ostiralero Plaza Handian egongo naiz euskaraz gozatu nahi duzuen ume, guraso eta familia guztien zain.