Bizkaiko Afizionatuen Ligan jokatu du aurten Real Santa Cruz taldeak. Hogei taldek parte hartu dute liga txapelketan eta zortzi onenak Kopa jokatzeko sailkatu ziren. Jose Reny Melgar taldeko entrenatzaileak aitortu duenez, denboraldiko azken txanpara sasoi betean heldu ziren Real Santa Cruz taldekoak, "
Ligako laugarren postua eskuratu ostean, itxaropentsu hasi genuen Kopa txapelketa. Final laurdenetako kanporaketa gainditu eta gero, Ligako txapelduna, Boavista taldea, kanporatu genuen finalaurrekoan. Partida estua izan zen. Bina berdindu ondoren, penaltietan irabazi genien". Zaldibarren jokatu zen finalean, baina, aurkari gogorra izan zuten aurrean eta 6 eta 1 amore eman behar izan zuten ermuarren aurka.
Finaleko emaitzarekin lotsatu xamar baina, oro har, denboraldian egindako lanarekin gustura dago Melgar entrenatzailea.
"Galdu ezean ezin da garaipenerako bidea ikasi", adierazi du, eta dagoeneko hasi da hurrengo denboraldia prestatzen. Taldearen oinarria mantendu eta fitxaketaren bat edo beste egiteko asmoa dutela aurreratu du.
