Ardura handiko zeregina da guraso izatea eta, zer esanik ez, seme
alabei ahalik eta heziketa onena ematea. Hala uste dute, eta egiaztatu
ahal izan dute, Patxi Galarragak eta Miren Vivesek, Añesen (2006) eta
Ingeren (2008) gurasoek. Euren ustez, baina, denok egin dezakegu
zerbait heziketa hori hobea izan dadin. Seme-alaben heziketa ardatz
duen bloga sortzea izan da euren aportazioa.
“Oraingoz, gure aportazio xumea blog hau (Mendaron guraso izatea) gidatzea izango da, komunikazioa hobetuz eztabaida aberatsagoak izango ditugulakoan”, azaldu du Mendaroko bikotea honek blogean bertan. Hausnarketa, iritzi, kexa edota txaloen bitartez seme-alaben heziketa hobetzen saiatzea da blogaren helburuetako bat, eta heziketa horretan eragin zuzena duten guztiei zuzenduta dago.
Adituei eginiko elkarrizketa eta bideoez gain, era guztietako gaiak landu dituzte orain arte: umeen negarren atzean ezkutatzen diren arrazoiak, haurren esfinterraren kontrolari buruzkoak, udaberriko eskulanak, zigorrak bai ala ez?, hazkunde-kurbak, e.a.
Hortaz beharra izanez gero, edota kuriositate hutsagatik bada ere, informazio erabilgarria aurkituko duzue blog honetan. Gogoratu, gainera, proposamenak eta ekarpenak egiteko aukera ere badagoela, eta euskaraz zein gaztelaniaz egin daitezkeela. (ikus hemen nola parte hartu)