Urruzunoko babes ofizialeko etxebizitzek 1.000 eskari izan dituzte

 

 

 Urruzunoko sustapenean babes ofizialeko 71 etxebizitza esleituko dira, eta horietatik etxebizitza bat Udalaren birkokatze-eragiketetarako bideratuko da. Honela banatuko dituzte gainerako 70 etxebizitzak:

• Hiru etxebizitza mugikortasun urri iraunkorra duten elbarriei egokitutakoak.
• 57 etxebizitza, 25 eta 35 urte bitarteko adinekoentzat.
• Hamar etxebizitza, gainerako eskatzaileentzat

 Guztira 1.000 eskaera izan dituzte Urruzunoko sustapeneko etxeek, eta 253 onartu dituzte. Onartutako eskarien artean, 164 eskari 25 eta 35 urte bitarteko adinekoentzako 57 etxebizitzen zozketan sartuko dira eta onartutako gainerako eskariak (89) beste hamar etxebizitzen zozketan.
Etxebidek argitaratu ditu onartutako eta baztertutako eskaeren zerrendak eta errekurtsoak aurkezteko epea uztailaren 28an amaitzen da.

•Zozketa urrian

 Elgoibarko Udalak eta Jaurlaritzak hitzarmena sinatu dute Urruzunoko babes ofizialeko etxebizitzen zozketa Etxebidek egin dezan, Udalak ezarritako irizpideak aintzat hartuz betiere: Aginduak etxebizitzak lagatzeko araubidea azalera-eskubidekoa izango dela aipatzen du. Kontuan hartuko diren eskabideak 2009ko abenduaren 31ra arte Etxebiden erregistratutakoak izango dira. Diru sarrerei dagokienez, urteko 9.000 eta 35.000 euro bitarteko sarreradunak sartzen dira barne (*Irizpide eta informazio osoagoa Euskal Herriko Agintaritzaren Aldizkarian).  "Horrela garbiagoa izango dela uste dugu", adierazi du Alfredo Etxeberriak. Zozketa "urriaren erdialdera" izango dela ere aurreratu du Elgoibarko alkateak.

 Azkenik, etxebizitzak eraikitzeko lanak hasita daude dagoeneko. Galdiano Eraikuntzak SAk sustatuko ditu.