San Pedro jaiei agur, datorren urtera arte

elgoibarren.net 2010ko uzt. 6a, 12:33

Amaitu dira aurtengoz Idotorbe auzoko San Pedro jaiak. Eguraldiak gehiegi lagundu ez badu ere, eliz aurrean jarri zuten karpari eta elkarte berriari esker aurrez pentsatutako ekintzak arazorik gabe egin ahal izan dituzte. Era guztietako ekitaldiak izan dira: idi-demak, gizon probak (ondoko argazkian), sainduren prozesioa, umeentzako jolasak, bolo txapelketa, gisatu dastaketa, etab. (argazkiak dauzka)

•Lehia eta demetako emaitzak
Lehiaketek eta indar erakustaldiek pisu handia izaten dute San Pedro jaietan eta aurten ere egon da non aukeratua. Hala, Urretxu eta Orioko taldeen arteko gizon proban, esaterako, kostaldekoak nagusitu ziren. Urretxuarrak irten ziren proba tokira irteten lehenengoak, eta 39 plaza, hiru zinta, sei metro eta 50 zentimetroko marka ezarri zuten 700 kiloko harriarekin. Orioko zortzikoteak, baina, urretxuarren marka hobetzea lortu zuen: 41 plaza, metro bat eta zortzi zentimetroko marka egin zuten hogei minutuko lanaren ostean.

Idiak lanean Idotorbeko probalekuan.

Domekan, berriz, idiek hartu zuten gizonen lekua eta hiru idi pare aritu ziren, nor baino nor, San Pedro Saria eskuratzeko borrokan. Azkenean, Itziarko Erretenen idi pareak egin zituen plaza gehien eta berarentzat izan zen lehen saria (950 euro, mantak eta Udalak emandako garaikurra). Erretenen idi pareak 52 plaza, hiru metro eta 57 zentimetroko marka egin zuen, Barriolaren idi pareak baino plaza bat eta zortzi zentimetro gehiago, hain zuzen ere. Eibarko Altzubarrenen idi parearen lana besteengandik urrun geratu zen, 24 plaza, zinta bat, metro bat eta 16 zentimetro egin zituzten.

Bolo Txapelketan Julian Loiola izan zen irabazlea, Javier Osoro eta Eduardo Arronaren aurretik. Elkarte inauguratu berrian jokatu zen Lehen Mus Txapelketan, azkenik, Luis Kortaberriak eta Iosu Iturbek osatutako bikoteak jantzi zuten irabazlearen txapela Jesus Mari Azpiazu eta Sabino Etxeberriari finalean irabazi eta gero.

•Motorraren zozketa

Jai batzordekoek zozketatu duten motorraren (ondoko argazkian) zozketan 1.355 zenbakia da saria jasoko duena. Txartelaren jabea agertuko ez balitz, 5.926 zenbakia da ordezkoa.

•Argazkiak:

Gizartea Elgoibar