Imanol Arguesok irabazi du Tenis Txapelketa

elgoibarren.net 2010ko uzt. 12a, 13:36
Deskargatu Info Ahotsak :

 
Imanol Arguesok irabazi du 40+15 Tenis eta Padel Elkarteak antolatu duen bigarren tenis txapelketa. Eibartarrak Markel Aranberri, hamabost urteko Debako jokalaria, hartu zuen mendean zapatuan, Mintxetako tenis pistan jokatu zen final ikusgarrian. Padel Txapelketan, bestalde, Juan Luis Etxanizek eta Patxi Vallejosek osatutako bikoteak jantzi du txapela.

 

Markel Aranbarri (ezkerrean) Imanol Argueso zoriontzen, partidaren amaieran.

Dezenteko beroa egiten zuen zapatu goizean Mintxetan. Hondartzarako edo igerilekuetara joateko eguraldi aproposa izanagatik, tenis zaletu mordoxka inguratu zen 40+15 elkarteak antolatutako bigarren tenis txapelketaren finala ikustera. Zaleak ez ziren hartutako erabakiaz damutu, aurtengo txapelketan finalera ailegatu diren bi jokalariek erakutsi zuten joko maila edozein zale asebetetzeko modukoa izan baitzen. Bi setetan (6-2 eta 6-4) irabazi zion Arguesosk Aranbarriri.
 Jokoan bien arteko aldea nabarmenegia izan ez bazen ere, Arguesoren sake bortitza erabakigarria izan zen azken emaitzan. Bere gorputz luzea baliatuz abiadura handiko sakeak gauzatu zituen Eibarko tenislariak eta finala irabazteko puntu erabakigarriak lortu zituen jokaldi horri esker. Guztira 50 tenislarik parte hartu dute aurtengo txapelketan.

Tenis eta padel txapelketako finalistak.

•Etxaniz eta Vallejos nagusi padel txapelketan
  Joan den eguenean (uztailak 8) jokatu zen, bestalde, padel txapelketaren finala. Bergararren arteko lehian, -finalera ailegatu diren lau jokalariak Bergarakoak ziren-, Juan Luis Etxaniz eta Patxi Vallejos nagusitu ziren. Etxanizek eta Vallejosek osatutako bikoteak Jorge Aranes eta Joseba Oregi hartu zuen mendean. Bigarren padel Txapelketan 25 bikotek parte hartu dute.
 
∞Lotura duten albisteak:
 
 
Kirola Elgoibar