Ekintzailetzako Ekiten programan parte hartu duten enpresa-proiekturik
onenen sariak banatu ditu Mondragon Unibertsitateak. Joanes Rodriguez
elgoibartarra kide den taldeak lehiaketak zituen hiru kategorietatik bi
irabazi ditu. Bata, taZEBAez enpresa proiektuari esker (Gazteria,
Aisialdia eta Kirol arloko Ideien I. Lehiaketa), eta bestea, Landazale
Kooperatibarekin (Landa-Gunea Garatzeko Ideia eta Proiektuen II.
Lehiaketa). Azken lehiaketa horretan, hirugarren postua eskuratu du
Garazi Konde elgoibartarraren taldeak.
Aurten, lehiaketan hiru kategoria bereizi dira aurrenekoz: Enpresa
Ideia Berrien IV. lehiaketa, Landa-Gunea Garatzeko Ideia eta Proiektuen
II. lehiaketa eta Gazteria, Aisialdia eta Kirol arloko Ideien I.
lehiaketa.
Lehiaketa horiek guztiak Mondragon Unibertsitatearen Ekiten
sustapenerako eta ekintzailetzarako programaren barruan kokatzen dira
eta guztira 35 taldek parte hartu dute aurtengo honetan.
Kategoria bakoitzeko lehen saria 1.000 eurokoa izan da eta irabazleek
proiektua gauzatzeko beka bat eskuratzeko aukera izango dute.
Kirolari gazteenei ezagutza eta balio berriak eskaini nahi dizkien coaching-eko ideia bati esker irabazi dute Joanes Rodriguezek eta taldekideek Gazteria, Aisialdia eta Kirol arloko Ideien I. Lehiaketako lehen saria. Taldekideek sortu duen webgunean azaltzen dituzte proiektu berri honen filosofia eta xehetasun guztiak. Ideietara mugatu beharrean proiektu batzuk gauzatzea ere lortu dutela ikus daiteke bertan. Real Madrid taldearen fundazioaren kanpusean lanean dihardute, besteak beste.