Jose Luis Diezek 45 ordutan amaitu zuen Ehun Milak proba

 

 

 Parte hartu zuten beste bi elgoibartarrek; Edu Uribek eta Jose Mari Juaristik, ezin izan zuten Euskal Herrian sekula antolatu den mendi lasterketarik luzeena eta gogorrena amaitu. Uribe proba bertan lagatzera behartu zuten antolatzaileek Amezketan zegoela, 96. Kilometroan, Aralarreko zeharkaldia arriskutsuegi zegoela-eta. Juaristik, berriz, bederatzi ordu zeramatzanean laga zuen bertan behera proba.

 Izena emanda zeuden 263 parte hartzaileetatik erdia baino gutxiago, 121 antxintxikari, hain justu, alegatu ziren Ehun Milak ultratrailaren helmugara. Imanol Aleson azkoitiarra sartu zen lehen postuan Beasainen zegoen helmugan. Azkoitiarrak 25 ordu, 14 minutu eta 18 segundo behar izan zituen 167 kilometroak betetzeko.

Ongi-etorria trikiti doinuekin

 Elgoibartik ere pasa zen Ehun Milak proba eta hainbat mendizalek Irukurutzetan eta Otsaurtian egin zieten ongi-etorria parte hartzaileei. Ez edonolako ongi-etorria, gainera, trikiti doinuekin agurtu baitzituzten antxintxikari saiatuak, gaueko 21:45etik goizaldeko 3:00ak arte. Irukurutzetara alegatu zen unea emozioz beterikoa izan zela adierazi du Edu Uribek: “Zegoen eguraldi kaxkarrarekin eta bertan Mikel, Aitor, Arkaitz eta beste elgoibartar batzuek lepotik heldu eta airean eraman naute. Plazerra benetan! Oraindik ere, idazten nagoen bitartean oilar haragia jartzen zait! Txapo Elgoibar!” idatzi du bere blogean (Mendi Lasterketa).

 Proba irabazteko faborito argia zen Iker Karrera pasa zen lehen postuan Otsaurtiatik, gaueko 21:45ak inguruan. Otsaurtiatik pasa zen azken antxintxikaria, berriz, goizaldeko 3:30ak inguruan pasa zen.