Etxean profeta izatea lortu du, beste behin, Jose Antonio Arrillagak, Aiastia San Migelgo artzain txakur txapelketa jokatzen den zelaitik metro gutxitara bizi baita Euskal Herriko txapeldun berria. Ingurua ondo ezagutzeak ez du, ordea, garaipena ziurtatzen, eta gogotik saiatu behar izan zuten Arrillagak eta
Txiki txakurrak.
Zortzi artzainek eta txakurrek parte hartu zuten finalean, eta lehen lanak egin ostean, bost onenak sailkatu ziren azken lanerako: Eskortan ardiak sartzea eta bertatik ateratzea. Guztiek asmatu zuten artaldea eskortaren ate aurreraino eramaten, ardiak barruraino sartu araztea, ordea, zailagoa izan zen, ardiak tematuta baitzeuden eta ez zuten amore eman nahi. Miguel Angel Elordik eta
Argi txakurrak eta Jose Antonio Arribillagak eta
Txikik bakarrik amaitu zuten lana, Arrillagak eta
Txikik azken segundoetan, gainera. Aurreko probetan lortutako puntuei esker jantzi zuten irabazlearen txapela. Honakoa ez da Arrillagak Aiastian lortzen duen estreinako txapela, aurrez beste lau alditan ere irabazitakoa baita Elgoibarren bizi den artzain eibartarra.
•Idi-demak eta Bolo txapelketako emaitzak
Bolo jokoak jarraitzaile asko eta maila handikoak ditu Aiastian; Hiru Txirlo bolo txapelketetan Euskal Herriko eta Gipuzkoako txapeldun bat baino gehiago eman du auzoak azken urteetan. San Migel jaietako bolo txapelketa ere maila handikoa izan zen, eta lehia estuaren ostean Joshua Lizundiak irabazi zuen tiraldia. Bost txirlo bota zituen bakarra izan zen.
Aurtengo idi-demetan, bestalde, Asteasuko Barriolaren idi parea izan zen jaun eta jabe. 44 plaza egin zituzten, Soarte elgoibartarraren idi-pareak baino sei plaza gehiago eta Bikixaren idiek baino ia zortzi plaza gehiago.
Argazkiak:
