Ganorazko frontoiaren aldeko aldarrikapena Lau t'erdiko Txapelketan

  Lau térdiko Txapelketak duen oihartzuna aprobetxatuz, euren mezua zabaltzea nahi zuten 10 bai taldeko kideek, eta partida aproposa aukeratu zuten horretarako, Irujo eta Gonzalezen arteko partidua ikustera jende asko joan zen-eta Astelena frontoira. Gainera, telebistaz eman zuten partida hori, eta lagun askok ikusi zuten estrategikoki kokatutako kartela.

•70 lagun bertso afarian

Elgoibarren 10 koadroko “ganorazko frontoi” baten aldeko aldarrikapena egiteaz gainera, beste hainbat ekintza antolatu ditu 10 baik, orain gutxi sortutako taldea izan arren. Plaza Handiko pilota txapelketa antolatu zuten lehenbizi eta orain pala txapelketan murgilduta daude. Horiez aparte, arrakasta handia eduki duten kamisetak ere atera dituzte eta bertso afaria ere antolatu zuten. Aurrez egi zuten trikipoteoan 50 bat lagun eta bertso afarian adin guztietako 70 lagun inguru batu ziren. Antolatzaileen esanetan, “Giro ederra sortu zen bai poteoan zein bertso afarian. Jendea gustura geratu zen bertsolariek botatako bertsoekin, eta, amaieran, bertsolariek beraiek ere oso gustura aritu zirela jakinarazi ziguten. Goizaldeko 1:30ak aldera amaitu genuen bertso-afaria”. Antolatzaileek joan ziren guztiak eta antolakuntzan lagundu zieten guztiak eskertu nahi dituzte.

 

•Pala txapelketa azken txanpara hurbiltzen
18 bikote ari dira parte hartzen 10 baik antolatutako pala txapelketan, hiru taldetan banatuta. Talde bakoitzeko bi bikote onenak eta hirugarren geratu diren bi bikoterik onenak sailkatuko dira, bi aste barru hasiko diren, final zortzirenak jokatzeko. Orain arte jokatutako partidetan giro ona izan dela nagusi nabarmendu dute antolatzaileek, “galdu edo irabazi, baina umore ona galdu gabe”. Elgoibar, Mendaro, Eibar, Soraluze eta Donostiako pilotariak parte hartzen ari dira txapelketan. Partidak 25 tantora jokatzen dituzte Ikastolako frontoian; zapatuetan 9:00etatik aurrera; eta, domeka arratsaldeetan.

 

 

*Goiko lehen argazkia: Morquecho.