Aurten ez da San Silvestre lasterketarik egingo

elgoibarren.net 2010ko abe. 2a, 14:35
Deskargatu Info Ahotsak :
Español English Français Català Galego

Urgazi Triatloi taldeko arduradunek aurreratu dute aurten ez dutela San Silvestre lasterketarik antolatuko. Abenduaren 31n Gabon zahar Feria eguna ere izango da, eta ondorioz lasterketa bertan behera lagatzea erabaki dute.
Bestalde, atletismo gaiekin jarraituz, sekula egin den Mamo Wolderen omenezko lasterketarik onena prestatzen ari direla aurreratu dute Mintxeta Atletismo Taldeko kideek. Juan Mugerza Krosaren baitan jokatuko da Mamo Wolde saria, 2011ko urtarrilaren 23an.


•San Silvestrerik ez

Gazte zein helduek faltan botako dute urtea antxitxika agurtu ezina

2006ko Urte Zahar Egunean antolatu zuen estreinakoz San Silvestre lasterketa Urgazi triatloi taldeak. Hasieratik harrera oso ona eduki zuen beste hainbat lekutan urteko azken egunean egiten den korrika saioa gurera ekartzeak, eta, hala, 156 lagunek parte hartu zuten estreinako edizioan. Indar hori mantendu eta areagotu egin zen ondoren etorri ziren edizioetan; 200 lagunen bueltan ibili da parte hartzea. Aurten, baina, etena izango du. Eta, datorren urtekoa ere ikusteko dago, zapatuan tokatuko baita 2011ko Urte Zahar Eguna.
  • Orain arte egin diren San Silvestre lasterketen kronikak eta irudiak: 2006, 2007, 2008, 2009

•Mamo Wolde sari lehiatuena

Federica Bevilacqua italiarrak (tropelaren buruan) irabazi zuen 2010eko Mamo Wolde saria emakumezkoetan.

Junior mailako atletentzako Mamo Wolde sariaren IX. edizioa inoiz egin den “hoberena” izango dela uste dute Mintxeta atletismo taldeko kideek. Aurtengoan Ingalaterrako, Frantziako eta Belgikako atletek parte hartuko dutela aurreratu dute, gizonezkoen zein emakumezkoen lasterketetan. “Bertako atletak lortzen ari diren emaitza onak ikusirik gonbidatu dugu estreinakoz Belgikako federazioa. Talde bikaina ekarriko dute Elgoibarrera”, ziurtatu dute antolatzaileek. Kataluniako eta Madrileko federazioak ere Mamo Wolde sarian izango direla gaineratu dute. “Bi federazio horiek talde sendoak ekarriko dituzte, txapelketan parte hartuko duten kategorietako atletarik hoberenak aukeratzen ari baitira hilabeteotan”.
 Era berean, Espainiako eta Euskal Herriko atletei ere bidali diete sarian parte hartzeko gonbidapena, “une honetan Europan dauden junior kategoriako atleta hoberenekin neurtzeko aukera izan dezaten”.
  Mamo Molde sariaren bigarren ediziotik aurrera, nazioarteko mailako lasterketa bilakatu zen; izan ere, edizio hartan atleta ingelesek parte hartu zuten estreinakoz. Gerora, atleta portugaldarrak, frantziarrak eta, besteak beste, italiarrak hasi ziren bertan parte hartzen. Urteak joan ahala, Mamo Wolde saria gero eta garrantzi handiagoa hartzen ari da; horrexegatik bertan parte hartzen duten atletek gero eta maila hobea dute.

 
 
Kirola Elgoibar