Abenduaren 21ean, datoren martitzenean, banatuko dituzte aurtengo kirol
federatuaren sariak. Musika Eskolako auditorioan izango da ekitaldia,
19:30ean hasita, eta azken urteetan bezala, sariak banatu aurretik
mahai inguru bat egingo dute. Iaz Juan Mugerza krosaren oraina eta iragana izan zen moduan, aurten mendizaletasuna izango da mahai-inguruko gaia: Lasterketak mendizaletasunaren parte dira ala ez?.
Honako lagun hauek parte hartuko dute eztabaidan: Mikel
Valdiviesok, Ehunmilak ultramaratoiko antolaketa batzordeko
presidenteak, Pyrenaica mendi aldizkariari lotuta dagoen Luis Alejos
mendizale eta idazleak, Maite Maiora antxitxikari mendaroarrak, eta
Andoitz Agirregomezkortak, Morkaiko Mendizale Elkarteko presidenteak.
•Kirol klubeei errekonozimendua
Solasaldia amaitu ondoren banatuko dituzte 2010eko kirol sariak. Udal Kirol Patronatuak herrian dauden 17 kluben lana aintzat hartu eta klub bakoitzeko kirolari zein kirolaren alde lanean diharduten hainbat lagun sarituko ditu.