Haur jaio berrien 2.500 euroko txekea -2.500 euroko diru laguntza jaiotako edo adoptatutako ume bakoitzeko- bertan behera geratu eta gero, 2011n jaioko den lehen elgoibartarra, gutxienez, ez da esku hutsik ailegatuko. Izan ere, EAJko Elgoibarko Uri Buru Batzarrak XX. mende hasierako ohitura bat berreskuratu nahi izan du eta otarra bat oparituko dio herriko lehen ume jaio berriari.
•1932ko argakia abiapuntu
Batzokiko pareta batean zintzilik dagoen goiko argazkia izan da ohitura hori berreskuratzeko abiapuntuetako bat. Iñaki Gorostiza da bertan ageri den haurra, 1932. urtean Elgoibarren, eta baita Gipuzkoan ere, jaio zen lehen haurra, hain zuzen ere. Candida Arregi, ama pontekoaren besoetan ageri da Iñaki Gorostiza San Bartolome parrokiaren atarian, 1932ko urtarrilaren 5ean, ateratako erretratuan. Pepita Garate, haurraren izeba da eskuinaldean dagoen emakumea. Gizonezkoa, berriz, Maximo Conde da, Elgoibarko EAJko Uri Batzarreko sasoi hartako lehendakaria, eta, kasualitatez, haurraren aita besoetakoa ere bai.