San Antonak, irudietan

 

 

Fernado Ansola futbolari ohia eta Juan Mari Andonegi Altzolatarren Dorretxea filatelia elkarteari estuki lotutako gizona omendu ditu aurten Altzolatarren Dorretxea filatelia elkarteak San Antonen bueltan antolatzen duen erakusketan. Fernando Ansola (1940-1986) gazte hil zen, 46 urterekin, baina kirol ibilbide luzea izan zuen. 1960ko martxoaren 27an debutatu zuen Lehenengo Mailan, Oviedo taldearekin. Gero, Betis, Valentzia eta Realean ere jiokatu zuen eta Espainiako selekzioaren elastikoa ere jantzi zuen, harik eta 35 urterekin futbola laga zuen arte.
  Juan Mari Andonegik, bestalde, pasioa zuen Elgoibarrekiko, eta filatelia elkarteak editatutako hainbat liburu idatzi zituen.
Joan den zapatuan (urtarrilak 15) inauguratu zuten filatelia erakusketan Fernando Ansolaren eta Juan Mari Andonegiren senideek parte hartu zuten eta omenaldi beroa jaso zuten. Erakusketa hilaren 23ra arte egongo da ikusgai Kultur Etxean. Ordutegia: aste barruan: 19:00etatikl 21:00etara, eta jaiegunetan: 12:00etatik 14:00etara eta 18:00etatik 21:00etara.

•Trial erakustaldia Madalan

Euskal Motoziklismo federakuntzak, bestalde, 2010eko txapelketei dagokien sari banaketa ekitaldia egin zuen zapatu goizean Herriko Antzokian. 2010 urteari dagozkion sariak banatu ondoren, Ibon Zorrilla Espainiako txapeldunak eta Jaime Busto Europako txapeldunek trial erakustaldia eskainiko zuten Madalako parkean prestatu zuten oztopo ibilbidean. Jende asko bildu zen motor gidarien abileziak gertutik jarraitzera.

•Dokumentala eta musika

  Aurrekoez gain, "Irribarreen paradisua" dokumentala estreinatu zuen Jairo Berbelek Herriko Antzokian. San Anton Egunean egin zen estreinaldira joan ezin izan zenutenok, datorren barixakuan (urtarrilak 21) edukiko duzue Kongon jasotako irudiekin osatutako dokumentala ikusteko bigarren aukera. Emanaldia 22:15ean hasiko da.
 Big-Band Experience taldeak ere, Iban Guinearen zuzendaritzapean, joan den astelehenean eskaini zuen kontzertua.