Zergatik abesten dute ingelesez euskal musika taldeek?

elgoibarren.net 2011ko urt. 21a, 14:58
Deskargatu Info Ahotsak :

Tituluko galdera horri erantzun nahian, ingelesez abesten duten hiru euskal talderi iritzia eskatu diete Argia astekarikoek, tartean Elgoibar eta Azpeitiko Jon & Sugramas taldeko kideei. Jon Gurrutxaga, taldeko kantariak eta letragileak, ingelesez sortu eta abesteko hiru ideia azpimarratu ditu: ingelesez abestea ohitura bihurtzea, fonetika, eta atzerrian aukerak izatea.


  Gurrutxagaren arrazonamenduak "Hizkuntzak musikan: Ingelesez kantari, estiloak eskatzen duelako" erreportajean (PDF-an) irakur ditzakezue osorik, argia.com-en. Ingelesez aritzen diren Berako Sexty Sexers eta Bilbo Ezkerraldeko Ama Say taldeen bidaia musikal-linguistikoaren berri ere ematen du erreportajeak.

•Elgoibarko azken kontzertuaren kronika

Argazkia: Urko Ansa.

Bestalde, Jon & Sugramas taldearekin jarraituz, joan den abenduaren 30ean, Elgoibarko kultur etxeko sotoan eskaini zuten kontzertu akustikoaren kronika eskegi du Urko Ansak musikazuzenean.com atarian. Ingelesez abestearen kontua, hain zuzen ere, hizpide izan du Ansak bere kronikan "...eta kontxo! Gurean gutxik lortu dezakete halako sinesgarritasuna ingelesez kantatzen!", idatzi du. Are gehiago, Ansaren ustetan, "Euskarazko kantuetan ere sonoritate anglosaxoia inprimatzen maisua dugu elgoibartarra (Jon Gurrutxaga abeslariz ari da), Egin iezaidazu, Bidaia, Portuko paradisuan... eta abarretan".
 
 
 
 
Kultura Elgoibar