•Komonen hirugarren garaipena
Gizonezkoen lasterketa nagusian lehia polita eduki dute bi kenyarrek, Leonard Komonek eta Micah Kogok. Sergey Ledid ukraniarra gogotik saiatu da afrikarren erritmoari eusten, eta zenbait unetan lortu du afrikarren bizkarra gertutik ikustea, baina ez da hortik pasa. Meritu handiko lasterketa egin du, hala ere, Europako kros txapelketa bederatzi alditan irabazi duen atleta ilehoriak. Markarik ontzeko helbururik ez dutenetan egin ei duten legez, lasai hasi dute lasterketa bi kenyarrek, eta erdialdera hasi dira erritmoa bizitzen. Komon eta Kogo elkarrekin joan dira zati handi batean, baina Komon ez zen fio bere herrikideak azken metroak egiteko duen abileziaz eta eraso gogorra jo du. Komon bakarrik sartu da helmugan, 32:04 denborarekin. Kogo izan da bigarrena (32:14), eta Lebid ukraniarra sailkatu da hirugaren postuan (32:15).
•Ezustekoa emakumezkoetan
Emakumezkoen lasterketa nagusian emozioa izan da nagusi azken metroetara arte. Afrikarrak atzean laga eta portugaldar bat (Sara Moreira) eta bi espainiarrek (Gemma Barrachina eta Diana Martin) hartu dute lasterketa burua, eta azkenera arte ez da argitu zeinek irabaziko zuen. Azkenean, Sara Moreira 26 urteko portugaldarrak irabazi du Mugertza krosa, Diana Martin espainiarrari azken zuzengunean aurrea hartu eta gero. Moreirak 22 minutu eta zortzi segundotan burutu du ibilbidea. Gema Barrachina (22:09) eta Alessandra Aguilar (22:11) espainiarrak sailkatu dira, hurrenez hurren, hirugarren eta laugarren postuetan.
Atleta afrikarrak oso apal ibili dira. Iazko irabazleak, Goshu etiopiarrak, zazpigarren postuarekin konformatu behar izan du eta iazko Munduko kros txapelketan seigarren sailkatu zen Margaret Muriuki kenyarra, berriz, oraindik atzerago sailkatu da. Muriukik oinutsik egin du antxitxika eta Mintxetara hurbildu diren zale asko zur eta lur laga ditu.
•Zozketako zenbaki saritua
2.236 zenbakidun sarreraren jabeak irabazi du Munduko kros txapelketa ikustera, Punta Umbriara (Huelva) joateko zozketa. Informazio gehiago
mintxeta.com webgunean
*Argazkiak: Jairo Berbel eta Asier Orbea.
