Zialtzeta eta Berdonces nagusi Elgoibarko mus kanporaketan

 
  Finalean iazko bikote irabazlea, Manuel Salegik eta Pedro Garatek osatutakoa, hartu zuten mendean Zialtzetak eta Berdoncesek. Bi bikote horiek ordezkatuko dute Elgoibar otsailaren 26an Seguran jokatuko den Gipuzkoako kanporaketan. Gipuzkoako kanporaketako irabazleak, bestalde, Euskal Herriko Mus Txapelketako finala jokatzeko sailkatuko dira. Final handia Urruñan (Lapurdi) jokatuko da martxoaren 12an. Bikote txapeldunak 3.000 euro eta lau lagunentzako nazioarteko bidaia bat eskuratuko ditu.

 Manuel Salegik eta Pedro Garatek osatutako bikoteak paper oso ona egin zuen iaz: Elgoibarko kanporaketa irabazi eta Gipuzkoakoan txapeldunorde izan ostean, Euskal Herriko Mus Txapelketan zazpigarren postuan sailkatzea lortu zuten. Aurten, iazkoa errepikatu eta, ahal bada, hobetzen saiatuko dira. Zialtzetak eta Berdoncesek ere erakutsi dute musean iaioak direla. Salegi eta Garate moduko esperientziadun bikotea gainditzeko gai izan badira, onenen parean ibiltzeko aukerak dituzte.

Kimetz elkarteak antolatuta, Lanbroa tabernan jokatu zen Elgoibarko kanporaketa. Giro aparta jarri zuten bertan parte hartu zuten hamalau bikoteek eta txapelketak luze jo zuen: Arratsaldeko 16:30etatik gaueko 21:30ak arte jardun zuten musean. Amaieran, parte hartzaile guztiek jaso zuten saria, Euskal Herriko Mus Federazioaren karta-joku bana, hain zuzen ere. Txapeldunordeentzako saria bi lagunentzako afaria izan zen eta irabazleen (Zialtzeta eta Berdonces) saria, berriz, lau lagunentzako afaria Lanbroa tabernan eta Errioxako ardo botila bana.