Dena prest mozorroen festarako

 Inauterietako egun handia bihar izango da. Atxutxiamaikak eta Udaleko Kultura Sailak hainbat ekitaldi antolatu dituzte, eta arratsaldetik gauera arte egongo da non aukeratu. Arratsaldean, Atxutxikaraokea eta mozorroen desfilea egingo dute Plaza Handian. Ondoren, Mauxitxa txarangaren kalejira izango da, eta gauerako, mozorro lehiaketa antolatu du Atxutxiamaikak.

•Epaimahaia herritarrek

Mozorro lehiaketan parte hartu nahi dutenek Madalako parkera agertu beharko dute. Lehiaketa 23:00etan hasiko da eta sari banaketa goizaldeko 1:00ak aldera egingo dute. Aurtengo berrikuntza epaimahaiaren osaketan egongo da. Aurreko edizioetan elkarte desberdinetako kideek osatu izan dute epaimahaia, baina aurtengo epaimahaia herritarrek osatzea nahi du Atxutxiamaikak. Hortaz, mozorro lehiaketako epaimahaia osatzeko interesa dutenek 943 741 626 telefonora deitu edo atxutxaiamiak@elgoibarkoizarra.com helbidera idatzi dezakete. Talde irabazleak 275 euro jasoko ditu; bigarrenak, 175 euro eta hirugarrenak, 125 euro. Bakarkakoetan 125 euroko bi sari banatuko dituzte. Mendaron, bestalde, txokolate jana, disko festa eta karaokea antolatu ditu Arno Guraso elkarteak zapatu arratsalderako.

•Mozorroen elkarretaratzea
 Martitzen arratsaldean mozorroen elkarretaratzea egingo dute Plaza Handian, 16:30ean. Kiki, Koko eta Moko pailazoen ikuskizuna ikusteko aukera izango dute Plaza Handira urreratzen direnek, eta ondoren, Mauxitxa txarangaren kalejirak alaituko ditu kaleak. Zaharren egoitzan, bestalde, Gelatxo orkestraren musika emanaldia eta mozorro lehiaketa antolatu dituzte, 18:30etik aurrera. Inauterietako egitarau guztia agendan duzue.

 

•Aurreko urteetako zenbait argazki: (argazki guztiak Mediatekan)

•2010eko zenbait bideo: (ikusi hemen 2009ko bideoak)