‘Elgoibarko ahozko euskara’ liburua aurkeztu du Jesus Mari Makazagak

 

 

2009. urtean Jesus Mari Makazagak aurkeztu zuen doktore tesiaren emaitza nagusia da liburu hau. Tesiaren zuzendaria Pello Salaburu euskaltzain osoa izan zen. Makazagak berak Bilbon, Euskaltzaindiaren egoitzan, eginiko aurkezpenean esandakoaren arabera, bere bi etxe izan direnak uztartzen dira lan honekin: EHU eta Euskaltzaindia, eta lan hau amaitzea eta argitaratzea haiekiko duen zorra kitatzeko modua dela gaineratu zuen elgoibartarrak. Elgoibarko ahozko euskara liburuak Akademiaren Iker bildumaren 25. zenbakia darama eta Euskal Herriko Unibertsitatearen eta Akademiaren arteko hitzarmenaren bidez argitaratu da.

•Herriko gazteentzat eredu eta bizitasun iturri
  Elgoibarko eta inguruetako adineko pertsonei egindako elkarrizketetan oinarritu da, batez ere, Makazaga datuak batzeko, eta euren euskara bizia goraipatu du: “Liburuan datozen esapide eta berba bereziek adierazkortasuna ematen diote hizkerari eta horregatik, herriko gazteentzat-eta eredu eta bizitasun iturri izatea nahiko nuke”. Elgoibarko ahozko euskararen deskribapena egiteaz gain, inguruko herrietako euskararekin alderatu du.

 Gramatika, lexikoa, esamoldeak eta abar batu ditu filologoak. Elgoibarko berezko 2.500 hitzez osatutako hiztegia ere jaso du liburuan. Lexikoarena, baina, beti osotzen joan behar den egitekoa dela zehaztu du Makazagak. Gainera, mota honetako monografikoetan agertzen ohi ez diren datu eta ondorioak sartzen ere ahalegindu da, “ikuspegi osoagoa emateko”.
  Makazagak eskerrak eman zizkien liburua egiten lagundu dieten guztiei, eta baita aurkezpen ekitaldira joan ziren elgoibartarrei ere.

• Hona hemen Elgoibarko ahozko euskara liburua aurkezteko Jesus Mari Makazagak esan zituen hitzak (PDF).

Liburua eskuratzeko sakatu hemen.