53 lagunek parte hartu zuten, joan den domekan (maiatzak 1), Mendaroko Txirrindulari Elkarteak antolatu zuen Mendaroko I. mendi lasterketan. Eta, 25 kilometroko ibilbidea egin ostean, 50 antxitxikari: 46 gizonezko eta lau emakumezko ailegatu ziren Herriko Enparantzan zegoen helmugaraino.
•Eskiatzaile olinpiko bat nagusi gizonezkoetan
Luis Alberto Hernando, Jakan bizi den Burgoseko korrikalaria, izan zen guztietan bizkorrena Mendaron, 1:57:18 denborarekin. Italiako Turin hirian ospatu ziren 2006ko Neguko Olinpiar Jokoetan parte hartutakoa da Hernando, goi mailako eskiatzaile eta atleta, hortaz. Turinen iraupen eskia eta erriflearen erabilera uztartzen dituen
biatloi proban parte hartu zuen Aragoiko Federazioko ekipoko kidea den Hernandok. Uda sasoian baina, elurrik ez dagoenean, mendi lasterketetan parte hartzen du iraupen eskirako beharrezkoak diren entrenamenduen gogor eta luzeen osagarri moduan. Eta ez da batere gaizki moldatzen. Azken urteetan
bere palmaresa nola loditu den ikusi besterik ez dago. Lortu dituen garaipen eta postu aipagarrien artean nabarmentzekoa da 2010ean munduko mendi lasterketen txapelketan, Italian jokatu zen Giir di Mont proban, eskuratu zuen
bigarren postua. Proba horietan jaun eta jabe den
Kilian Jornet katalanak bakarrik hartu zion
aurrea Hernandori. Gauzak horrela, goi mailako kirolariak estreinatu du Mendaroko I. Mendi Lasterketako palmaresa.
Probaren irabazleak eta bigarren postuan sailkatu zen Igon Manzisidor debarrak bakarrik bukatu zituzten lanak bi orduren azpitik. Hirugarren postuan ailegatu zen Ibai Alba hernaniarrak Manzisidorrek baino lau minutu gehiago behar izan zituen 25 kilometroko ibilbidea osatzeko. Iñigo Lariz izan zen sailkapeneko lehen elgoibartarra eta Ion Revert, berriz, lehen mendaroarra.
•Maite Maiorak areriorik ez
Emakumezkoetan Maite Maiorak ez zuen areriorik izan, eta parte hartu zuten beste hiru emakumeen aurrean erraz nagusitu zen. Zegama Aizkorri Mendi Maratoia prestatzen buru belarri dihardu Mendaroko atletak, eta etxean jokatu zen proba sasoi puntua neurtzeko aproposa zen oso. Orain gutxi Hondarribiko Talaia Bidea mendi lasterketan lortutako hirugarren postua eta Berako mendi lasterketan lortu zuen laugarren postua gehitu behar zaizkio Mendaron lortutako garaipenari.
•Sailkapena:
-
Luis Alberto Hernando (1:57:18)
- Igon Mancisidor (1.59:38)
- Ibai Alba (2:04:46)
- Iñigo Lariz (2:09:23)
*Lehenengo emakumezkoa: Maite Maiora (2:23:43)
*Lehenengo mendaroarra: Ion Revert (2:13:01)
Argazkiak:
