Jose Luis Ibarzabal: "Politika egiteko modu berriak eraman nahi ditu Bilduk Udalera"

 Auzitegi Konstituzionalak hartuko duen erabakiaren inguruan dituzten kezka eta zalantzak agerian laga zituzten Elgoibarko Bildu koalizioko (EA, Alternatiba eta independenteak) 17 hautagaiek Kultur Etxean egin zuten hautagaien aurkezpenean. Kezka eta zalantzen gainetik, baina, udal hauteskundeetarako aurkeztu nahiko luketen programaren ildo nagusiak azaldu zituzten.

 Jose Luis Ibarzabal Bilduko zerrendaburuak esandakoaren arabera, "politika egiteko modu berriak" eraman nahi ditu Bilduk Udalera. Ildo horretan, herritarren parte hartzea eta udal kudeaketaren gardentasuna "indartu" nahi dituztela azaldu zuen: "Herria herritarrekin egiten da. Hortaz, parte hartzearen alde egin nahi dugu, herri galdeketak eta erreferendumak moduko tresnen bitartez. Era berean, gardentasunaren alde egiten dugu. Udaleko hitzarmenen inguruko informazioa eskainiko diegu herritarrei eta batzorde eta batzar-agirietara sarbidea erraztu".
Kultur eragileekiko gertutasuna da Bilduren programako gakoetako bat, euskara bultzatzearekin batera. Kultur zentro baten beharra ere ikusten du koalizioak, eta Aita Agirre eraikina dela kokagune aproposena defendatzen dute.

 Bestalde, krisiak kaltetutako pertsonei laguntzeko eta emakumeei laguntzeko gizarte politikek lehentasuna dute Bilduren programan. Eta, gazteengana ere iritsi nahi du Bilduk. Alor honetan gazteen parte hartzea bultzatzea "ezinbestekoa" dela uste dute. "Balio handiko gazte asko dago Elgoibarren. Horiek herriarentzat lan egin dezaten lortu behar dugu", nabarmendu zuen Ainhoa Mendibil Bilduko hautagaiak. Gazte Asanbladak kudeatutako gaztetxe baten beharra dagoela gaineratu zuen Mendibilek. Zapatu arratsaldeetan herrian sortzen diren arazoen inguruan, azkenik, arazoari konponbidea emateko arazoaren sustraietara jo behar dela adierazi zuen eta horretarako ikastetxeekin elkarlanean aritzeko asmoa dutela.

•Kiroldegi berririk ez
  Kiroldegiaren gaia ere aipatu zuten. Bilduko hautagaiak ez dira kiroldegi berri bat eraikitzearen aldekoak. "Gaur egungo kiroldegia egokitu eta handitzea hobe dela uste dugu". Alabaina, Elgoibarren aisialdirako gune estali baten funtzioa bete dezakeen arauzko frontoi bat eraikitzearen alde daude Bildukoak.

•   Bilduk Elgoibarren aurkeztu nahi duen programaren inguruko informazio osoagoa bildu.info webgunean.

•Lotura duten albisteak:

• Argitaratu dituzte hauteskundeetarako hautagaien zerrendak (2011-04-20)