Hamabost tabernarik parte hartuko dute hirugarren pintxo lehiaketan

elgoibarren.net 2011ko eka. 22a, 14:45
Deskargatu Info Ahotsak :

 
Ekainaren 30ean eta uztailaren 1ean egingo dute hirugarren pintxo lehiaketa. Hamabost tabernarik hartuko dute parte, eta pintxoak 1,10 euro balioko ditu. Lehen bi edizioetan Txarriduna tabernak irabazi zuen Pintxo lehiaketa. (pintxoen argazkiak eta ezaugarriak dauzka)

 


 Eguenean (ekainak 30) 19:00etatik 22:00etara egongo da pintxoak dastatzeko aukera, eta barixakuan 11:30etik aurrera. Aurtengo edizioan hamabost tabernarik hartuko dute parte, iaz baino hiru gehiagok: Txarriduna, Urkiola, Gabi, King-Kong, El Gautxo, Gorbea, Xagua, Iturri, Salento, Ametsa, Lanbroa, Pilon, Mahats, Viento sur eta Lojantzi. Pintxoaren prezioa, bestalde, 1,10 eurokoa izango da. Ostalaritza sektorea kalitatezko produktuak egin eta eskaintzeko gai dela ezagutarazi nahi dute antolatzaileek ekimen honekin eta baita kaleko giroa sustatu ere.
Bi sari banatuko dituzte, bata epaimahaiak emango du, eta, bestea, herritarrek aukeratuko dute. Botoa ematen duten guztien artean, Belaustegi jatetxean bi lagunentzako dastatze menua zozketatuko dute.

•Informazio guztia euskaraz

1706638896481 Hamabost tabernarik parte hartuko dute hirugarren pintxo lehiaketan

Elgoibarko Izarra Kultur Elkarteak antolatu zuen estreinako pintxo lehiaketa orain hiru urte, Gurean Bai I. Pintxo Lehiaketa izenarekin. Ostalaritzan euskara sustatzeko helburuarekin antolatu zuten lehiaketa Gurean Bai-Ostalaritza proiektuak (dagoeneko desagertuta dago), eta Elgoibarko Udaleko Merkataritza Sailak. Hasierako asmo hura mantentzen dutela azaldu du Elgoibarko alkateak, Alfredo Etxeberriak, hirugarren pintxo lehiaketaren aurkezpenean. Hala, taberna bakoitzean egongo diren kartel eta lehiaketaren inguruko aipamen guztiak euskara hutsean egongo direla aurreratu du.

•Eguenetako pintxo poteoa
 Elgoibarko Ostalarien Elkartea sortu dute, berriki, Elgoibarko hainbat ostalarik ostalaritza indartu eta elkarrekin lan egiteko asmoz. Imanol Urain, Txarridunako ugazaba, da elkarteko estreinako presidentea, eta berak emandako datuen arabera, herrian dauden 50 bat taberna eta jatetxe ingurutik hogeik eman dute izena elkartean oraingoz. Bestalde, pintxo lehiaketa egin den bi edizioetan herriko taberna eta jatetxeen bueltan “giro oso ona” sortu dela uste du Urainek. “Gainera, pintxo kurioso bat egiteko ahalegina egitera behartzen gaitu ostalariok”, nabarmendu du. Horrez gain, eguenetako pintxo poteoaren ohitura bultzatu eta ezartzeko abiapuntu egokia izan daitekeela uste du ostalarien elkarteko presidenteak.
 


 
 
 
 
Gizartea Elgoibar