Federatutako 11 talde osatu dituzte aurten Sanlokoek (neskenak, sei; eta mutilenak bost); eta Eskubaloi Eskolan beste lau talde daude (neskenak bi, eta mutilenak beste bi). Denboraldirako helburuei dagokionez, senior mailako nesken eta mutilen taldeak Euskal Ligan jokatzen dute. Mutilen taldeak iaz lortu zuen igoera, eta maila berri horretan jokatzeko hainbat fitxaketa garrantzitsu egin dituzte: Besteak beste, Gorka Garate Arrateko jokalari ohia, eta Julen Hernandez, Zumaiako Pulpo taldekoa; biak elgoibartarrak. Sanloren nahia mutilen taldea goiko postuetan ibiltzea da. Nesketan, aldiz, igoera fasea jokatzeko aukera ere izan dezaketela uste dute. Era berean, kadete eta jubenil mailako mutilen taldeak Euskal Ligan jokatzea nahiko luke klubak, nesken taldeak bezalaxe.
90.000 euroko aurrekontua mugitzen du Sanlok, baina Cesar Arriola presidenteak dio ez dela aurrekontu erreala. Izan ere, gurasoek jartzen dituzte partidetara joateko autoak, jokalariek erosten dituzte txandalak, eta beste hainbat gastu ere aurrekontutik kanpo geratzen dira. Jokalari bakoitzak bere fitxa ordaintzen du, loteria saltzen dute klubarentzat dirua lortzeko, eta ez du inork kobratzen.
- Ikusi hemen: Lehen jardunaldiko emaitzak eta datorren astebururako (urriak 8-9) partiden agenda.
- Informazio osoagoa: sanlo.net
Argazkiak: (Federatutako 11 taldeak eta Eskubaloi Eskolan diharduten neska-mutilen argazkiak)