Gipuzkoako Bertsolari Txapelketako finalerako sarrerak salgai

  2011ko Gipuzkoako Bertsolari Txapelketako finalerako sarrerak 18 euro balio ditu, eta autobus txartelak hamar euro (Elgoibarko Izarrako bazkideek, 8 euro). Informazio gehiago 943 741 626 telefonoan edo elgoibarkoizarra@elgoibarkoizarra.com (Imanol) e-postan. Eta, bestela, pasa Elgoibarko Izarrak Ubitarte 4an daukan egoitzatik.

•Uxue Alberdi finaletik kanpo

Idiazabalen jokatu zuen Uxue Alberdi bertsolari elgoibartarrak Gipuzkoako Bertsolari Txapelketako final laurdena, baina ez zuen finalerdietara pasatzerik lortu. Sei bertsolari izan ziren lehian, eta elgoibartarrak bosgarren lekuan amaitu zuen kanporaketa, 461 punturekin. Jon Martin izan zen lehen sailkatua 494 punturekin, Felix Zubiak 482 puntu lortu zituen, Nerea Elustondok 474,5 eta Ainhoa Agirreazaldegik 468,5. Azken lekua Oier Aizpuruarentzat izan zen, 457 punturekin.

 Honenbestez, elgoibartarrak ezin izan du 2007ko Gipuzkoako txapelketan lortu zuen emaitza ona errepikatu, finalaurrekoetaraino ailegatzea lortu zuen-eta orduko hartan. Azkenengo Bertsolari Txapelketa Nagusian -2009an- ere urrutira ailegatu zen Alberdi, final handiaren atarian geratu baitzen.

•Bertso-eskola berria sortu dute Elgoibarren
Bertsoak alde batera laga gabe, berri onak daude herriko bertsolazeentzat, Bertso-eskola berria sortu dute-eta Elgoibarren. Baina ez herrian bertso-eskolari ez zegoelako; zegoen hura hobetzeko asmotan baizik. Bederatzi urte bete ditu Errazu Bertso-eskolak Ikastolan. Orain ordea, Ikastolatik irtenda, herrira zabaltzea erabaki dute arduradunek eta hori ez ezik, Elgoibarko bertsozale mugimendua indartu eta saretzea ere bada euren helburua. Ondoko argazkian dauzkazue Bertso eskolako irakasleak: Amets Izagirre, Mikel Olaizola eta Ane Astigarraga.

• BARREN astekariko azken alean (802 zenbakia/PDF) daukazue informazio guztia.

•Bertsolari filma eskainiko du Ongarrik, eguenean

Azaroko zine zikloaren barruan, Bertsolari filma ikusteko aukera izango da datorren eguenean, hilak 17, Ongarri zine-klubaren eskutik. Bertsolaritza mundua azaltzen duen dokumentala da Bertsolari, baina bertsolaritza erakusteaz gain, Asier Altuna zuzendariak bertsolaritzak dituen elementuekin jokatu du, lanak zinematografikoki interesa izan dezan. Zuzendariak esandakoaren arabera, bertsolaritzaz ezer ere ez
dakienak ere ulertzeko moduko pelikula da. Filma Donostiako Zinemaldiko sail Ofizialean aurkeztu zuten, baina lehiaketatik kanpo.

Ikusi hemen filmaren trailer-a (hemen, berriz aurrerapena):

{vimeo}28942749{/vimeo}