Omenaldi beroa jaso zuten Kortaberrik eta Agarretxikik Kontzezio azokan

•Lizaso eta Garcia nagusi, trontza apustuan

Idi proben itzulera izan zen nobedade nagusia iazko Kontzezio Azokan. Aurten, berriz, Esteban Elorza Kortaberri eta Agustin Larrañaga Agarretxiki trontzalari ohiak omentzeko Mendaroko Udalak antolatu zuen herri kirol jaialdiak eman du zeresana. Harri-jasotzaileek, aizkolariek eta trontzalari profesionalek parte hartu zuten bertan, 27 kirolarik orotara. Ikusmin handiena, baina, kirolari gisa baino beste alor batzuetan aritzeagatik ezagunak diren lau lagunen arteko trontza apustuak sortu zuen. Sebastian Lizaso eta Andoni Egaña bertsolariak, Sonia Garcia, Mendaroko alkatea, eta Toki Alai jatetxeko Nerea Arebalo lagun zituztela egin zuten apustuak, alegia.

 Lizasok eta Sonia Garciak moztu zituzten azkarrago hiru enbor zatiak, eta, ondorioz, Egañak eta Nerea Arebalok ordaindu behar izan zuten bazkaria, horixe zen-eta jokoan jarri zutena. Lau protagonistak etxeko lanak eginda eta ondo prestatuta agertu ziren plazara. Izan ere, Agustin Larrañagaren baserrian egin dituzte entrenamenduak, bi omenduen begiradapean eta haien aholkuak jarraituz. Apustuan bertan ere botillero lanetan jardun zuten Agarretxikik eta Kortaberrik. Julian Larrea 82 urteko Bizkaiko herri kirolariak ere parte hartu zuen jaialdian, bere ilobarekin trontza saioan bikote eginez, eta horiek ere bereganatu zuten ikusleen arreta.

•Sagardo lehiaketa Petritegirentzat
 Herri kirolez gain, baserriko produktuak ikusteko, erosteko eta dastatzeko aukera izan zuten Kontzezio azokara hurbildu ziren lagunek. Guztira 17 postu jarri zituzten eta Mendaroko baserrietako eta inguruko herrietatik hurbildutako baserritarren produktuak egon ziren horietan. Sagardo dastaketa eta lehiaketa ere egin zituzten, eta Astigarragako Petritegi sagardotegiak aurkeztutako sagardoak irabazi zuen lehiaketa. Baserritar jantzi dotoreenari urtero ematen zaion saria, berriz, Igor Ezenarrok eta Amagoia Zabalak irabazi zuten. Azkenik, Mendaroko basorik txukunenari ematen zaion saria Kareaga baserriak eskuratu zuen.

 Kirolari mendaroarrek ere parte hartu zuten herri kirol jaialdian. Unai Salegi Sarubek eta Andoni Zubiaurre Gorixok trontzan jardun zuten eta Jon Larrañagak, Gotzon Zulaikak eta Igor Reyk, bestalde, lokotx biltze proban. Euskal Herriko txapeldunak, Jon Larrañagak, amaitu zituen lanak azkarren, Zulaika eta Reyren aurretik.

  Argazkiak: