Mintxetako igerilekuak eta atletismo pista zeharkatzen zituen 3.078 metroko ibilbidea osatu zuten neskek, eta Miren Martin izan zen helmugara iristen lehena, 12 minutu eta 5 segundoko denborarekin. Proba honetan sei elgoibartarrek parte hartu zuten, Arreiturre Institutua ordezkatuz. Nora Mandiola izan zen elgoibartarren artean azkarrena eta sailkapen nagusiko 10. postuan ailegatu zen helmugara. Maria Arrieta 18. postuan sailkatu zen eta Perales ahizpak, Nerea eta Maider, 22. postuan eta 26. postuan sartu ziren helmugan. Postu horiei esker, taldekako sailkapeneko laugarren postua eskuratu zuten Mintxeta Atletismo Taldeko kide diren elgoibartarrek. Lehen eta bigarren postuetan sailkatu ziren Gipuzkoako eta Bizkaiko selekzioek, baina, ez dira sailkapen nagusirako kontutan hartzen. Hortaz, elgoibartarrak sailkatu ziren Euskadiko txapelketako bigarren postuan. Talde bakoitzeko lehen lau atleten postuak hartzen dira kontutan taldekako sailkapenerako, baina Nagore Bergarak eta Koro Sabandok ere egin zuten korrika. Lehena 29. postuan sailkatu zen eta 40. postuan bigarrena. Guztira 67 atletak eta hamabi taldek parte hartu zuten nesken lasterketan (ikus nesken sailkapena/PDF)
|
|
- Argazkiak eta bideoak hemen: www.kultura.ejgv.euskadi.net