Zarauzko Udaberri Jaialdiaren bigarren edizioa martxoaren 31n hasiko da eta estreinako edizioan egin zuten moduan, estilo desberdinetako hainbat musika kontzertu uztartuko ditu Zurekin Zarauzko Ostalarien elkarteak antolatutako musika jaialdiak. Antolatzaileek izen handiko taldeak lotu dituzte aurtengorako eta bakoitza bere generoan “prestigio handikoa” dela adierazi dute. Besteak beste, Rosario Flores, Soziedad Alkoholika, Bizardunak eta Gatibu izango dira aurten izar nagusiak.
•Sarreren salmenta
Zarauzko bi gunetan, Munoa plazan eta Udal kiroldegian, izango dira kontzertu guztiak maiatzaren 26ra bitartean. Sarrerak eskuragarri daude Kutxa.net plataformaren bidez edota 943-001 200 telefonora deituta eskura daitezke kontzertuotarako txartelak, aurrez. Zarauzko ohiko tabernetan ere erosi ahalko dira, esate baterako, Txiki-Polit eta Eguzki tabernetan. Jakinarazi dutenez, sarrerak merkeago izango dira aurrez. Hala ere, egunean bertan ere leihatilan eskuratu ahalko dira. Rosario Floresen emanaldirako sarrerak 28 eurotan salduko dituzte leihatilan; aurrez erosten dituztenek, berriz, 25 euro ordaindu beharko dituzte.