Apirilaren 16an hasiko dira Pedro Migel Urruzuno kalea berritzeko lanak

elgoibarren.net 2012ko api. 3a, 15:15
Deskargatu Info Ahotsak :

 
Pedro Miguel Urruzuno kalea eta Lorituaneko aldapa berritzeko lanak apirilaren 16an hasiko direla aurreratu dute Udal ordezkariek. Construcciones Galdiano enpresari 206.000 euroren truke esleitu zaizkion berritze lanak hiru hilabetez luzatuko dira.



 Bi jarduera desberdin aurreikusi dituzte udal arduradunek inguru honetan. Batetik, Lorituaneko aldapan, “zoru ez labainkorra, espaloi zabalagoa, barandak eta eskailera egoki batzuk jarriko dira”.
•Autoen joan-etorria kontrolatzeko kamera bat

Lorituaneko aldapan zoru ez labainkorra eta espaloi zabalagoa jarriko dituzte, besteak beste.

Udala, gainera, bertan, baimendutako motordun ibilgailuen joan-etorria mugatzeko jarrita dagoen gontza kendu, eta horren ordez autoen joan-etorria kontrolatzeko kamera bat jartzeko aukera aztertzen ari da. Udaleko Hirigintza Sailak aditzera eman duenez, “aukera honek aurrera egingo balu, kamerak malda horretatik igarotzen diren ibilgailuak grabatuko ditu, eta isuna jarriko zaie handik igarotzeko baimenik ez dutenei”. Dena dela, kamera jarriz gero, ondoan panel bat jarriko da gidariei malda hori igarotzea debekatuta dagoela, eta arau-hausleei isunak jarriko zaizkiela aditzera emateko.
•Kale erdia osoa beharrean
  Bestalde, Udalak Pedro Migel Urruzuno kale osoa berriz urbanizatzeko asmoa bazuen ere, Lorituaneko aldapatik Banco Guipuzcoanoraino doan tartean bakarrik egingo dituzte azkenean berritze lanak; izan ere, Anbulatorio parean suak kiskali zuen orubean etxeak eraikitzeko egiten ari diren lanen ondorioz, “ezinezkoa da kale guztian obrak egitea”.
  Nolanahi ere, aurreikusitako jardueraren baitan, zabaldu egingo da Ego-Toki elkartearen ondotik doan espaloia, espaloiak eta galtzadaren zorua “sestra berean” jarriko dira, kalean dauden sei aparkalekuak kendu eta espaloian dauden zuhaitzak galtzadarantz eramango dira.
Bukatzeko lurrazpiko edukiontziak dauden lekuan utziko dira. Horiek horrela, konponketa lanak amaitutakoan, kalearen itxura “Santa Ana kalekoaren antzekoa” izango dela jakinarazi dute Hirigintzako arduradunek.
 
 
 
 
Gizartea Elgoibar