Elgoibarko Izarrak jarriko du txosna bihar, hilabeteko azken zapatuko ferian

elgoibarren.net 2012ko api. 27a, 11:28
Deskargatu Info Ahotsak :
es en fr

Hil bukaerako feria egingo da bihar Elgoibarren. Egitaraua ohikoa izango da, baina berrikuntza bat gehitu dute biharko: gatzatua egiten ikasteko tailerra. Hemendik aurrerako ferietan hilero umeentzako tailer bat jarriko dute Debemenek eta Udalak elkarlanean, eta horren barruan ulertu behar da gatzatua egiteko biharko tailerra. Bestalde, aldianaldian herriko elkarte bati egokitzen zaio txosnaren ardura hartzea, eta bihar, Elgoibarko Izarra kultur elkarteak kudeatuko du.


  Elgoibarko Izarrako kideek, 11:00etatik aurrera, Elgoibarko baserritarrek eta hemen bertako harategiek emandako produktuekin egindako haragi-bola, txorizo, odoloste eta gazta eta irasagar pintxoak salduko dituzte, euro batean.

1706638368522 Elgoibarko Izarrak jarriko du txosna bihar, hilabeteko azken zapatuko ferian

Gainerakoan, Elgoibarko baserrietako produktuak erosteko aukera izango da 9:00etatik 14:00ak bitartean. Eguerdian, eta hilabeteko azken feria egunez ohiko bihurtu denez, kale kantariak taldekoak (ondoko argazkian) irtengo dira kantura, eta ordu horretatik aurrera, arratsaldera arte, ganadu azoka egongo da Aita Agirre plazan (Plaza txikia).
 
•Errege kopako finalerako sarreren zozketa
 Aurrekoez gain, Club Deportivo Elgoibarrek eta Herri Eskolako guraso elkarteak mahai bana jarriko dute Kalebarren plazan (Nafarroa Plaza). Club Deportivo Elgoibarkoek errifak salduko dituzte, eta errifak erosten dituzten guztien artean, maiatzaren 25ean Bartzelonak eta Athleticek jokatuko duten Errege kopako finalerako bi sarrera zozkatuko dituzte. Herri Eskolako guraso elkarteak, berriz, eskola publikoaren materiala salduko du.
 
 
 
Gizartea Elgoibar