Lendinez bigarren eta Lazkano laugarren Azkoitiko duatloian

elgoibarren.net 2012ko mai. 2a, 15:11
Deskargatu Info Ahotsak :

 
Joan den domekan jokatu zuten Azkoitiko XIII. Duatloia, eta Ainhoa Lendinez elgoibartarrak bigarren egin zuen emakumezkoetan, 1:50:22 denborarekin. Gizonezkoen proban, Arrigorriagako duatloian erakutsi zuen sasoiari eutsiz –zazpigarren egin zuen-, lasterketa bikaina egin zuen Iñigo Lazkano mendaroarrak, eta podiumaren atarian geratu zen, laugarren postuan sailkatuta.

 


Bigarren postuan amaitu zuen Ainhoa Lendinezek (beltzez) Azkoitiko Duatloia.

Parte-hartzaileek zortzi kilometro egin behar izan zituzten lasterka, gero 36 kilometro bizikletan eta bukatzeko beste lau kilometro egin zituzten korrika. Proba ez zela eskalatzaileentzat aproposa nabarmendu du Ainhoa Lendinezek eta korrika ondo moldatzen direnek bizikleta gaineko espezialistei “egurra” eman ziela gaineratu. Halaxe izan zen bere kasuan ere. Nerea Etxeberria azpeitiarrak bi minutuko aldea atera zion korrikako lehen saioan eta, tartea txikitu zuen arren, bizikleta gainean egin beharreko kilometroetan ezin izan zuen aldea murriztu, besteak beste, aldea murrizteko moduko porturik edo zailtasun aipagarririk ez zegoelako ibilbidean, kirolari elgoibartarrak azaldu duenez.
 Helmugan ia bi minutuko aldea atera zion azpeitiarrak elgoibartarrari, baina egindako lanarekin oso pozik dagoela adierazi du Urgazi Triatloi taldeko kideak. Leire Etxezarreta izan zen helmugara ailegatu zen hirugarren emakumezkoa, Lendinezengandik 19 segundora.

•“Egurrezko domina” Lazkanorentzat
Duatloi denboraldi bikaina egiten ari da Iñigo Lazkano aurtengoan ere. Orain pare bat aste zazpigarren postua lortu zuen Arrigorriagako duatloian eta Azkoitikoan postu hura hobetzea lortu zuen domekan. Laugarren postuan sailkatu zen Lazkano, 1:33:02 denborarekin. Ander Agirre bergararra izan da azkarrena, 01:28:11 denborarekin. Guztira, 142 parte-hartzaile izan zituen Azkoitiko Duatloiak, tartean hiru elgoibartar eta mendaroar bat. Izan ere, Lendinez eta Lazkanoz ainera, Jose Antonio Ruiz eta Javi Fernandez elgoibartarrek ere hartu zuten parte proban.
•Gizonezkoen sailkapena:
    1. Ander Agirre (1:28:11)
    2. Endika Garcia (1:28:20)
    3. Beñat Arnaiz (1:28:45)
    4. Iñigo Lazkano (1:33:02)

    23. Jose Antonio Ruiz (1:37:03)
    66. Javi Fernandez (1:42:39)

•Emakumezkoen sailkapena:
    1. Nerea Etxeberria (1:48:47)
    2. Ainhoa Lendinez (1:50:01)
    3. Leire Etxezarreta (1:50:22)
 
*Argazkiak: Urgazi eta Azkoitiko Hitza.
 
 
 
 
 
Kirola Elgoibar