Gol baten aldeaz galdu du Alcortak igoera faseko lehen partida

Olaizaga kiroldegiko harmailak zalez gainezka zeudela jokatu zuen Alcortak Estatuko Bigarren Mailarako igoera faseko kanporaketako lehen partidua. Zale grinatsuek giro aparta jarri zuten arren, ez zen garaipena eskuratzeko nahikoa izan. La Garriga taldeak hasieratik hartu zuen aurrea markagailuan eta bere eskuetan egon zen partidaren agintea uneoro. Hala ere, elgoibartarrek ez zuten sekula amorerik eman eta atsedenaldira, esaterako, hamahiruna berdinduta ailegatu ziren. Bigarren zatian hiru eta lau goleko errentak kudeatzen jakin zuten kataluniarrek, baina Alcortako jokalariek azken minutuetan eginiko ahaleginari esker, partida berdindu edo irabazteko aukerak izan zituzten. Tamalez, itxuraz jaurtiketa argiak ziruditenak huts egin zituzten une erabakigarrietan eta ezin izan zioten markagailuari buelta eman. 

•Bigarren jardunaldiko partidak
 Igoera faseko bigarren jardunaldian, SD Oberenak eta H. La Garriga taldeek jokatuko dute lehenik, 17:30ean. Ondoren, 19:15ean, BM Logroño taldearen aurka jokatuko du Alcorta Forging Group Elgoibar taldeak. Errioxarrek 26 eta 31 irabazi zuten Oberenaren aurka jokatutako lehen partidan. Hortaz, lehen postua edo, gutxienez, bigarrena eskuratzeko nahitaez irabazi beharreko partida izango da elgoibartarrentzat. Informazio osoagoa: sanlo.net

Argazkiak: