Victor Zubiaurre zena omendu dute Guardiako Gaitaren Egunean

Victor Zubiaurreren alargunak, Mari Carmen Azpiazuk hunkituta jaso zituen antolatzaileek oparitzat eman zizkioten oroigarri bat eta Victorren izena daraman ardo pitxar bat (beheko argazkietan). Antolatzaileentzako eta bertan bildutakoentzako esker oneko berbak esan zituen Azpiazuk oholtza gainetik. Victor Zubiaurre musikari elgoibartarra 46 urtean Elgoibarko Udal Musika Bandako kidea izan zen. Mauxitxa txarangako sortzaileetako bat izateaz gain, Elgoibarko Dultzaineroen taldea ere sortu zuen Txomin Mujika eta Rikardo Gorritirekin batera.

 

  Guardiako Gaitaren Eguna maiatzaren bigarren asteburuan egiten dute eta Jesus Martinez "Jimeleo" Guardako gaitari nagusiaren omenez hasi ziren jaialdia antolatzen, duela hogeita hamazortzi urte, eta urteekin gero eta lagun gehiago biltzen dira bertan. Euskal Herriko eta Espainiako hainbat tokitatik joandako gaita eta dultzainero taldeek girotu zituzten aurtengoan ere Guardiako bazterrak; eta, Elgoibarko Dultzainero taldea ere han izan zen, beste behin ere. Victor Zubiaurreri omenaldia egin behar zituela-eta, Elgoibartik ere makina bat lagun joan ziren, autoz batzuk eta autobusean besteak.