Pintxo lehiaketak Elgoibarren eta Mendaron

elgoibarren.net 2012ko mai. 23a, 15:33
Deskargatu Info Ahotsak :
Español English Français Català Galego

 
Pintxozaleak pozik egoteko moduan dira. Mendaroko I. Pintxo Lehiaketa egingo dute, asteburuan, Mendaron. Elgoibarren, berriz, bitik lau egunera luzatu dute -ekainaren 19tik 22ra-, Elgoibarko IV. Pintxo Lehiaketa. Ondoko argazkian, iazko lehiaketako irabazle nagusia, Gabi jatetxeko Mozzarella Meteoritoa pintxoa.




 Mendaroko estreinako pintxo lehiaketan sei tabernak hartuko dute parte: Aitzbeltz, Arrats, Luzaide, Menditxo, Txirristaka eta Uztargi tabernek, hain zuzen ere. Datorren barixaku (maiatzak 25) arratsaldean, 18:00etatik aurrera, eta zapatuan, egun osoz, dastatu ahal izango dira aipaturiko tabernetan pintxo lehiaketan parte hartuko duten mokaduak. Bi sari egongo dira jokoan, epaimahai batek emango du bata, eta, herritarrek emango dute bestea, euren botoen bitartez, 1etik 10era puntuatu ahal izango dituzte-eta pintxoak. Euro batean salduko dituzte lehiaketako pintxoak.

•Elgoibarko IV. Pintxo Lehiaketa

2011ko pintxo lehiaketako parte hartzaile eta antolatzaileak, sari banaketan.

Ekainaren 19tik 22ra bitartean egingo dute Elgoibarko Pintxo Lehiaketaren laugarren ekitaldia. Hau da, aurreko aldietan baino luzeagoa izango da, ostalarien eskariei kasu eginez bi egunetan luzatu dute-eta pintxoak dastatzeko aukera. Beste berrikuntza nagusia, Elgoibarko baserrietako produktuekin osatutako pintxo onenarentzat sari berezi bat egongo dela izango da. Dagoeneko 20 tabernak eman dute izena pintxo lehiaketan parte hartzeko. Iaz 15 izan zirela azaldu dute antolatzaileek eta hori seinale ona dela nabarmendu du Alfredo Etxeberria alkateak. Aurreko aldietan arrakasta handia izan duen ekimena izan dela esan du alkateak.
 Iaz, Gabi jaetxeko Mozzarella Meteoritoa pintxoak Pintxo Onenaren Saria eta Herritarren Saria eskuratu zituen.

Egunak eta ordutegia
  • Martitzenean eta eguaztenean (ekainak 19 eta 20) 18:00etatik 22:00etara
  • Eguenean eta barixakuan (ekainak 21 eta 22) 12:00etatik 15:00etara eta 18:00etatik 22:00etara.

∞Lotura duten albisteak:

 

 

 

Gizartea Elgoibar