Kontzertu berezia izan zen Udal Musika Bandak, joan den zapatuan, Kalegoen plazan eskaini zuena, dantzan eta kantuan jarri nahi zituzten-eta ikus-entzuleak. Eta lortu zuten hein batean. Plaza jendez beteta zegoela eskaini zuten kontzertua eta abesti herrikoiak (Haurrak ikas zazue, Ikusi mendizaleak, Aitorren hizkuntz zaharra eta Atxiketan potxiketan) interpretatzeko ordua iritsi zenean koru erraldoi bat zirudien Kalegoen plazak.
•Pieza bat Regina Arrietari eskainia
Aurten 50 urte betetzen dituela-eta opari bat ere egin zion Elgoibarko Udal Musika Bandak Elgoibar Ikastolari. Txomin Mujika musika bandako zuzendariaren eskutik jaso zuen oparia German Meabebasterretxeak, Ikastolako presidenteak. Era berean, Regina Arrieta Soraizi pieza bat ere eskaini zion Udal Musika Bandak. Musikari gazteek osatzen dute gaur egun Udal Musika Banda eta gehienak Reginaren ikasle ohiak direla aipatu zuen oholtza gainetik Txomin Mujikak, makina bat urtean musika irakaslea izan baita Regina Arrieta Elgoibar Ikastolan.
Argazkiak: (Elgoibar Ikastola)
