Hogeita bat tabernak hartuko dute parte laugarren pintxo lehiaketan

elgoibarren.net 2012ko eka. 14a, 12:31
Deskargatu Info Ahotsak :

Ekainaren 19tik 22ra, estreinakoz lau egunez, egingo dute Elgoibarko IV. Pintxo Lehiaketa. Aurtengoan sekula baino taberna gehiagok eman dute izena, hogeita bat tabernak, hain justu ere (iaz hamabost izan ziren). Epaimahaiak eta herritarrek euren botoekin emango dituzten sariez gain, Elgoibarko baserrietako produktuekin osatutako pintxo onenarentzat sari berezia egongo da. Sei tabernak izango dute sari hori irabazteko aukera. (pintxoen argazkiak eta ezaugarriak dauzka)



1706638236039 Hogeita bat tabernak hartuko dute parte laugarren pintxo lehiaketan

Hona hemen, IV. Pintxo Lehiaketako taberna parte-hartzaileen izenak: Orbea, Txarriduna, Gabi, King-Kong, El Gautxo, Gorbea, Xagua, Iturri, Salento, Ibai-ondo, Iriondo, Larre, San Roke, Tantaka, Usua, Ametsa, Lanbroa, Pilon, Mahats Ardotegia, Viento Sur Gastroteka eta Herri Gain.

 

Lehiaketaren egunak eta ordutegia:
  • Ekainaren 19an, 20an eta 21ean (martitzena, eguaztena eta eguena) 19:00etatik 22:00etara.
  • Ekainaren 22an (barixakua) 12:00etatik 15:00etara eta 19:00etatik 22:00etara.
Pintxoaren kostua, berriz,  1,10 eurokoa izango da.

•Hiru sari
  Elgoibarko Udalak antolatzen duen lehiaketan hiru sari banatuko dira: Elgoibarko pintxo onenaren saria, “Baserrikoa” pintxoaren saria eta, azkenik, herritarren saria; azken hau pintxoa dastatzen duen jendearen botuen bitartez aukeratuko da. Gainera, botua ematen duten guztien artean, Belaustegi Jatetxeak eskainitako dastaketa menu bat zotz egingo da. "Baserrikoa" pintxoaren saria irabazteko lehian sei taberna izango direla jakinarazi dute antolatzaileek, herriko eta sasoiko produktuekin bakarrik egindako pintxoak aurkeztu dituzten taberna kopurua horixe baita. Bestalde, pintxo onenaren saria emango duen epaimahai teknikoak pintxoaren itxura eta aurkezpena; zaporea eta testura; eta, originaltasuna baloratuko dituela aurreratu dute antolatzaileek.
•Zapatuan, Altzolan
 Altzolan ere pintxo lehiaketa egingo dute, zapatuan (ekainak 15), Zubibaik antolatuta. Edonork hartu dezake parte, norberak egindako pintxoekin. 12 eta 24 pintxo artean aurkeztu beharko ditu partaide bakoitzak, 12:00etarako, Altzolako frontoian. Irabazleak 60 euro jasoko ditu, bigarrenak 40 euro eta hirugarrenak 20 euro. Sari banaketaren ostean pintxoak dastatzeko aukera izango dute bertaratzen direnek.
 

∞Lotura duten albisteak:

 
Gizartea Elgoibar