Auzoetako jaiak: Urruzunoko jaiak zapatuan eta Sanmigeldarren Eguna domekan

•Urruzunoko jaiak, zapatuan
Auzoan hildakoen omenez meza izango da zapatu arratsaldean, 17:30ean, eta ondoren mokadutxoa banatuko dute. Meza osterako, eta ohitura bihurtu den legez, motor erakusketa antolatu dute, eta iluntzean, afaltzeko batuko dira guztiak auzoko gastronomia elkartean. Auzokoentzako ez ezik kanpotik joaten direnentzako ere egingo dute lekua soziedadean, antolatzaileek jakinarazi dutenez. June eta Tamara soinu joleek alaituko dute eguna.

•Sanmigeldarren Eguna, domekan

Sanmigeldarren Eguna ospatuko dute domekan (ekainak 17). Meza nagusiarekin hasiko dute eguna, 11:30ean. Meza ostean, salda eta txorizoa banatuko dituzte, eta 12:30ean, auzotarren arteko esku pilota partidak jokatuko dira. Urtero bezala, bazkaria izango da, hala ere, eguneko ekitaldi nagusia. 14:30ean batuko dira bazkaltzeko eta aurten Aiastiako eskolan ikasitakoak batzeko aprobetxatuko dute. Orain 40 urte itxi zuten eskola, eta hango ikasle izan zirenek taldeko argazkia aterako dute bazkalostean. Ondoren, dantzaldia izango dute, Elustondo anaiekin. Bazkaritarako txartelak 30 euroan jarri dituzte salgai ondorengo lekuetan: Armueta, Ziarda eta Sahatsu harategietan eta Kalamua Elkartean.

•San Juan eta San Pedro jaiak
Altzolako San Juan jaiek eta Idotorbe auzoko jaiek hartuko dute Aiastia eta Urruzuno auzokoen lekukoa datorren astetik aurrera. Ekainaren 23tik 25era artean ospatuko dituzte Altzolan San Juan jaiak eta ekainaren 24an, 28an, 29an, 30ean eta uztailaren 1ean ospatuko dituzte San Pedro jaiak Idotorbe auzoan.