Bertikalen Zirkuituko liderra da Lariz, Txindokin bigarren egin ostean

Domekan jokatu zen III.Txindoki Bertikala mendi lasterketa, Euskal Herriko Lasterketa Bertikalen Zirkuituko bigarren proba puntuagarria. 155 lagunek hartu zuten parte proban eta Hassan Ait Chaou izan zen guztietan azkarrena. Larraitzetik (Abaltzisketa) Txindokiko tontorrera arteko bidea -3.878 metro eta 931 metroko desnibela- 35 minutu justuan egin zituen Aitchaouk. Lafuma Team taldeko Iñigo Lariz elgoibartarra ailegatu zen bigarren postuan tontorrera, irabazlearengandik 32 segundora. Hirugarren sailkatuari, Mikel Beunzari, 30 segundoko aldea atera zion Larizek. (ikus sailkapena) 

 Bigarren postu horri esker, Bertikalen Zirkuituko lehen postuan dago Iñigo Lariz (ikus sailkapen orokorra/PDF). Azpeitian eta Txindokin batutako 176 puntu ditu elgoibartarrak, bigarren postuan sailkatuta dagoen Hassan Ait Chaouk baino lau puntu gehiago.

  Hurrengo proba Uharte Arakil-Beriango Kilometro Bertikala izango da, irailaren 23an, eta Anboto Bertikalarekin amaituko da, urriaren 6an, 2012ko Euskal Herriko Lasterketa Bertikalen Zirkuitua.

 

 *Argazkiak: Iñigo Lariz eta Aitor Igarategi.