Elgoibarko Udal Kirol Patronatuak eta Debegesa Garapen Agentziak eskualdeko BTT kluben laguntzarekin antolatutako martxa herrikoia da honakoa eta helburua partaideei mendi bizikletaz gozatzeko aukera eskaintzea da eta Debabarreneko BTT Zentroak dituen ibilbide ikusgarriak ezagutzera ematea. Honen harira, argazki eta bideo dotoreez jantzitako Debabarrenako BTT zentroari buruzko erreportaje ikusgarria egin du Iberobike atari ezpezializatuak. Ikusi hemen: iberobike.com
Parte-hartzaileek bi ibilbide izan zituzten aukeran, bata laburra, 25 kilometrokoa eta bestea luzea, 45 kilometrokoa. Lokatzak eta euriak ibilbidea are gogorragoa egin zuten arren, Karakateko paraje ederrez gozatzeko aukera izan zuten beste behin bizikleta zaleek.
Bestalde, parte-hartzaileak laguntzera joandako lagunen itxaronaldia arintzeko, aurten lehendabiziko aldiz, antolatzaileek spinning saioa burutu zuten Mintxetako Kirolgunean eta dozena bat lagunek hartu zuten parte.
Behin proba amaituta, sari ugariren zozketa egin zen. 30 opari baino gehiago banatu zituzten partaideen artean, hala nola, bazkariak edota afariak, egonaldiak hotel edota nekazal turismoetan, kirol materiala, bisita gidatuak, produktu gastronomikoak... denak ere Debabarreneko alojamendu, jatetxe eta kirol dendek eskainitakoak.
Ondoren, Mintxetako aparkalekuan kokaturiko karpa erraldoian, bazkari goxoa dastatzeko aukera izan zuten bertara hurbildutakoek, 100 bat lagun batu ziren. Eta egunari amaiera borobila emateko, bazkalondoren Melissa & The Jacks taldeak zuzeneko kontzertua eskaini zuen.
•Erreportajea Planeta MTB aldizkarian
Partaideen artean txirrindularitzari buruzko Planeta MTB aldizkari ezaguneko bi kazetari izan ziren. Proba ikaragarri gustatu zitzaien eta hemendik gutxira erreportaje zabala argitaratuko dutela iragarri zuten.
•Debabarreneko IV. BTT Martxako argazkiak (Guztiak Picasan)