Iazko abuztuan zendu zen Pedro Mari Egaña “Mintxeta” harrijasotzailearen omenezkoa izango da aurrerantzean San Bartolomeetako harrijasotze txapelketa. Izenarena, baina, ez da berrikuntza bakarra, Kalamua elkarteak txapelketaren egitura aldatu baitu. Hala, orain arte baino harrijasotzaile gehiago aurkeztuko diren itxaropenarekin, adin muga kendu dute, 35 urtez azpiko harrijasotzaileentzako txapelketa zen-eta orain arte.
Aldaketa nabarmenena, baina, egin beharreko lanean datza. Hiru harri erregularrekin beharrean bi harri irregularrekin egin beharko dituzte-eta jasoaldiak. Javier Arriola “Egi” harrijasotzaileak aurkitu zuen Mintxeta harria zaharberritzen ari ziren baserri bateko horman eta Pedro Mari Egaña “Mintxetak” harrijasotzaileak entrenatzeko bere baserrian erabiltzen zuelako jarri diote izen hori. Belaustegi harria, bestalde, Aiastiako baserrian ahaztuta egon da urteetan.
Harri bakoitzarekin bost minutuan altxaldi gehien egiten dituen harrijasotzaileak irabaziko du Mintxeta Memoriala, abuztuaren 25ean (Baserritarren Eguna), 18:00etan hasita, Kalegoen plazan.
|
|
|
|
