300 jokalari eta 17 talde, urtetik urtera handituz doa Sanloren familia

 

 Hazkunde prozesuan jarraitzen du Sanlok. Klubaren aurtengo zenbakiei erreparatuz gero, federatutako 14 talde (neskenak 7 eta mutilenak 7) osatu dituzte 2012-2013 denboraldirako, alegia, iaz baino federatutako hiru talde gehiago. Horiez gain, Eskubaloi Eskolan hiru talde (neskenak 2 eta mutilenak 1) osatu dituzte.

Kirol arloan talde bakoitzak bere mailara egokitutako helburuak dituela azaldu du Cesar Arriola Sanloko presidenteak: “Alcortarentzat nazional mailari eustea izango da helburua, senior emakumezkoen taldeak, Tecnifuellek Euskadiko txapeldun titulua defendatu beharko du, senior mutilen bigarren taldearentzat Gipuzkoako lehen mailara igotzea izango da erronka, kadete eta jubenil neskek Euskadiko talderik onenen aurka jokatuko dute eta maila horri eustea izango dute helburu nagusia. Kategoria horretara jauzi egitea izango da, hain justu ere, maila horietan diharduten mutilen asmo nagusia”.

 Era berean, Arriolaren berbetan, bazkide kopurua igotzea eta etapa berri honetara egokitu eta ahalik hobekien moldatzea izango dira klubaren beste erronka nagusiak. Asmo horretan, 120.000 euroko aurrekontua izango du Sanlok denboraldi honetan, iaz baino 30.000 euro gehiago.

• Sanlo kiriol-klubeko talde guztien argazkiak