Barixakuan Kiribil barraskiloak eta Mauxitxa txarangaren kalejirak jarri zuten giroa Errosario kalean eta Munduko III. Igel-toka jaurtiketa txapelketak ere parte hartze handia izan zuen. Sigma aldera joan zen txapela, Ruiz izan zen-eta jaurtitzailerik trebeena. Zuriñe Conde eta Alfredo Perez sailkatu ziren bigarren eta hirugarren postuetan, hurrenez hurren.
•Mikel Goñiren gantxo mediatikoa
Errosario kaleko jai batzordeak eta Lagunak pilota eskolak antolatu zuten pilota jaialdiak jende asko erakarri zuen, zapatuan, Kalegoen plazako frontoira. Argi geratu zen frontoietara jendetza erakartzen duela Goñik oraindik ere. Jaialdiko partida nagusiaren aurretik, baina, pala partiduaz gozatzeko aukera izan zuten ikusleek. Beitiak eta Berguak 25 eta 23 hartu zituzten mendean Gallas eta Leiaristi, gomazko pilotarekin jokatu zen norgehiagokan. Partida estelarrean, Mikel Goñik eta Arrastoak 25-20 irabazi zieten Txaferi eta Escuderori. Garfe enpresan dihardu gaur Egun Mikel Goñik eta asteburu gehienetan jokatzen ditu partidak han eta hemen. Lehen bezala, frontoiak betetzen ditu orain ere, erakargarri bilakatzen baititu kartelak. (Irakurri hemen: Goñik Gaztezulo aldizkariari eskaini zion elkarrizketa)
Pilota jaialdiaren ostean, hainbat herritarrek hart zuten parte Errosario kaleko jaietako ekintzarik hunkigarrienean, Errosarioko Ama Birjinaren irudipean Salbea abestea, alegia.
•Erosketa txekeen zozketa
Errosario kaleko dendetan gastatzeko erosketa baleen zozketan 1817 zenbakia izan da saritua. Ordezko zenbakia 0859a da. Saria jasotzeko azaroaren 9ra arteko epe muga du saritutako zenbakiaren jabeak.
Hona hemen 2012ko Errosario jaiak, irudietan: