Elgoibarren banatu dituzte gaur (urriak 18)
Gure Balioak sariak. Debabarrenako eskualdean gizarte balioen arloan nabarmendu den pertsona edo entitatearen lana aitortu eta saritzeko sortutako sariketa da hau, eta aurten, Elgoibarko udala, Inazio Bereziartua Musika Eskola, DanobatGroup eta Goratu enpresaren laguntza izan du
Debegesak ekimen hau antolatzeko. Ekitaldia Inazio Bereziartua Musika Eskolan egin dute. Jesus Bilbaok hunkituta jaso du Gure Balioak saria Gemma Agirregomezkortaren eskutik
Jesus Bilbao 16 urterekin hasi zen lanean, Danobaten, eta 26 urterekin gerente zen jada. 60ko hamarkada amaieran eta 70eko hasieran, Euskadiko Kutxako Batzorde Errektoreko kide izan zen. 1974an, Danobat laga eta erreminta makinaren alorreko enpresari batzuekin batera, Maherholding eratu zuen, eta zuzendaritza orokorreko kide izan zen, 2005ean erretiroa hartu zuen arte. Garai horretan, Goratu enpresako Zuzendari Nagusi izan zen zortzi urtez. Gainera, Maherholding, Inverma, AFM, Acomhe, Tekniker, Fatronik, Ekor, Adegi, Adegilan eta IMHko kontseilu edota zuzendaritzatan parte hartu zuen. Era berean, Elgoibar Ikastolako presidente ere izan zen, eta gaur egun Fasys eta Anateusk proiektuetan dabil lanean.
