Emugi egitasmoa saritu dute Udalsarea 21 sarietan

elgoibarren.net 2012ko aza. 13a, 16:14
Deskargatu Info Ahotsak :
es en fr

 
Udalsarea 21 sariek Araba, Bizkaia eta Gipuzkoako udalen praktika jasangarri egokienak aintzat hartzen dituzte. Aldaketa klimatikoa izeneko kategorian, Elgoibarko Udalak sustatutako Emugi egitasmoak jaso du saria. Era berean, Debabarrenak ere jaso du sari bat, Biodibertsitatea kategorian, Deba eta Ego ibaiak berreskuratzeko sortu zuten “Bizigura Deba ibaia” proiektuari esker. Saritutako proiektu bakoitzak 3.000 euro jasoko ditu.


 Udalsarea 21 Jasangarritasunerako Udalerrien Euskal Sarea da eta, 2008an hasita, bi urtean behin antolatzen ditu Udalsarea 21 sariak, Tokiko Jasangarritasunerako Jardunbide Egokienak saritzen dituen ekimena. Azken edizioan 86 udalerrik aurkeztu zituzten beren proiektuak. Antolatzaileek bost kategoriatan sailkatzen dituzte sariak. Hemen kategoria bakoitzeko irabazleak eta finalistak:
  1. Aldaketa klimatikoa: Irabazlea: Elgoibar; finalistak Uribe-Kosta eta Basauri.
  2. Biodibertsitatea: Irabazlea: Debabarrena; finalistak Barakaldo eta Gasteiz.
  3. Jasangarritasuna bultzatzeko heziketa: Irabazlea: Legazpi; finalistak Balmaseda eta Tolosaldea.
  4. Osoko iraunkortasuna: Irabazlea: Nerbioi-Ibaizabal
  5. Ekoberrikuntza: Irabazlea: Zumarraga; finalistak Amurrio eta Donostia
 Elgoibarko Udalak, mugikortasun jasangarria bultzatzeko helburuarekin 2011n martxan jarri zuen Emugi egitasmoari esker jaso du Udalsarea 21 saria, Aldaketa klimatikoa kategorian. Antolatzaileek aditzera eman dutenez, pertsonen eta salgaien mugikortasun iraunkorra bultzatzeko eginiko ahalegina saritu dute.
  Debabarrena eskualdeak, berriz, Biodibertsitate kategoriako saria jaso du, Barakaldok eta Gasteizek –beste bi finalistek- aurkeztutako proiektuei aurrea hartuz. Deba eta Ego Ibaiak berreskuratzeko eta balioa emateko Debegesak eta URAk, Uraren Euskal Agentziak, garatutako Bizigura proiektuagatik jaso du saria Debabarrenak.

•Sari banaketa, azaroaren 21ean
 Azaroaren 21ean egingo dute sari banaketa ekitaldia Donostiako Kursaalen. Euskal Udalerrien Tokiko Agenda 21en 9. jardunaldien barruan egingo dute sari banaketa.
 
 
 
 
Udala Elgoibar