Bihar jokatuko da Alkortako Igoera

elgoibarren.net 2012ko aza. 23a, 09:30
Deskargatu Info Ahotsak :

 
Bihar jokatuko da Alkortako Igoera. Karakateko Igoera jokatu osteko zapaturako antolatu ohi dute urtero Alkortako Igoera, presoen alde, eta bereziki 197/2006 doktrina, Parot doktrina, salatzeko. Aurten, Mendaroko Herrira taldeak egin du deialdia. Goizeko 10:30ean irtengo dira korrikalariak udaletxe aurretik, eta Alkorta baserrira arteko aldatzetan neurtuko dituzte indarrak. Guztira, 4,7 kilometroko ibilbidea da, asfaltoan.

 

 Antolatzaileek aurreratu dute hiru sari izango direla: txapela eta garaikurra irabazleentzat (gizonezkoetan eta emakumezkoetan), eta garaikur bana bigarren eta hirugarren sailkatzen direnentzako.

Gotzon Zulaika eta atzerago Jon Larrañaga, 2011ko Alkortako Igoeran.

Iaz, 22 lagunek parte hartu zuten, eta Iñigo Lazkano mendaroarrak jantzi zuen txapela. Errekorra ezarri zuen gainera, Joseba Plazak 2008an egindako denbora [20:43] hemeretzi segundoan onduta [20:24ko denboran egin zuen Lazkanok]. Lazkanoren atzetik Iñigo Lariz eta Iñigo Ortuoste sailkatu ziren, 21:02 eta 22:19ko denborekin hurrenez hurren. Emakumezkoetan Nerea Amilibia izan zen azkarrena eta hark ere errekorra ondu zuen, 25 minutu eta 40 segundoko denborarekin.
 Izenemateak bihar bertan egin behar dira, irteeran, lasterketa hasi baino orduerdi aurretik, bi euroren truke.
 Lasterketa bukaeran, hamaiketakoa banatuko dutela jakinarazi dute antolatzaileek Alkortara igotzen diren guztientzat.
 
 
 
 
 
 
 
Kirola Elgoibar