‘Aritza’ren harri zaharrekin marka jartzen saiatuko da Izeta II.a domekan Mendaron

 

  Egur Sport enpresak antolatu du, Mendaroko Udalaren babesarekin, domekan Mendaroko Goñati pilotalekuan egingo duten herri kirol jaialdia. 12:00etatik aurrera, harrijasotze saioa eta aizkora txapelketa uztartuko ditu jaialdiak.

Sarrerak, Txirristaka eta Uztargi tabernatan eros daitezke, 5 euroan aldez aurretik erosiz gero, eta 15 euro egunean bertan takilan erosita. Umeek ez dute sarrerarik ordaindu behar.

•Izeta II.-aren erronka berria
 Gaur egungo harrijasotzailerik nabarmenetakoa da Joxe Ramon Iruretagoiena Izeta II (Aia, 1967). Duela 30 urte hasi zen harriak jasotzen, eta harrezkero makina bat marka jarri eta ondu ditu. Horiekin ase ez eta beste erronka bat jarri dio orain bere buruari, Aritza harrijasotzaile mitikoaren harriak erabiliz marka jartzen ahaleginduko baita Mendaron.

Pedro Mari Txurruka Aritza 1894an jaio zen Mutrikun, eta 1925 urte ingurura arte harria jasotzen aritu zen hainbat plazatan. Hamar inguru harri zituen eta horietako bi aukeratu ditu Izeta II.ak: 137 kiloko lauki-zuzen zaharra da, eta bestea bere garaian 100 kilo zen kubikoa. Horiekin saiatuko da marka jartzen. Izetaren asmoa 137 kiloko harriarekin 15 minutuko lana egitea da, eta denbora hori amaitu eta epaileak txistua jotzen duenean, bigarren harriarekin beste hainbeste egitea. Hortaz, ordu-erdian atsedenik hartu gabe jardungo du harria jasotzen. Bi harri zahar erabiliz ordu erdiko marka jarri nahi duen “estreinako aldia” dela argitu du Aiako harrijasotzaileak. Era berean, Aritzaren harriak gaur egun erabiltzen dituzten harrien oso ezberdinak direla azaldu du. “Formari dagokionean, esaterako, lauki-zuzen zaharrak ez du harria heldu ahal izateko eskuentzat zulorik; dado baten forma du, eta heltzeko zaila da oso, oso behetik hartu behar baita harria. Kubikoa, berriz, ez da guztiz kubikoa, alde batek besteak baino gehiago neurtzen baitu. Harria altxatzerakoan asko nabarmentzen da bi aldeen arteko desberdintasuna, oreka mantentzea zaila egiten baita”.

• Informazio osoagoa: Urola Kostako Hitzan Izetari egin dioten elkarrizketan.

•Eusko Label Aizkora Txapelketako finalerdiak
  Eusko Label Binakako Aizkora Txapelketako finalerdiak ere jokatuko dira Goñati pilotalekuan. Joseba Otaegik eta Unai Otañok osatutako bikoteak Aitzol Atutxa eta Ugaitz Mugertzaren aurka neurtuko dituzte indarrak. ETB1-ek eta ETB-Sat kateek zuzenean emango dute Mendaroko herri kirol saioa.