Bluestock taldeak kontzertua eskainiko du barixakuan Kultur Etxeko sotoan

elgoibarren.net 2013ko ots. 21a, 15:16
Deskargatu Info Ahotsak :

 
Bluestock taldeak kontzertua eskainiko du barixaku honetan (otsailak 22), Sinuosek antolatuta. Aitor Badiola elgoibartarraren musika proiektu berria da Bluestock, eta taldearen izenak berak aditzera ematen duen bezala, blues doinuak ekarriko dituzte Elgoibarko Kultur Etxeko sotora.



1706637741011 Bluestock taldeak kontzertua eskainiko du barixakuan Kultur Etxeko sotoan

Arima Beltza taldea desegin ondoren beste hainbat musika proiektutan ibili da Aitor Badiola elgoibartarra, eta gaur egun Bluestock taldeko kideetako bat da. Bluestock 2009an sortu zen Zarautzen. Aitor Badiola (gitarra eta ahotsa), Iker Urkiri (gitarra), Beñat Santxez (baxua eta ahotsa), Maria Armendariz (ahotsa) eta Juan Otegik (bateria) osatzen dute taldea. Taldekideetako batzuek badute eskarmenturik musika munduan, esate baterako Arima Beltza, Pariak Bai, Vanpopel, Betiko Kontuak eta Jikuri taldeetan ibilitakoak baitira.
 Orain dela urtebete Bi pauso izeneko diskoa kaleratu zuen taldeak, Gaztelupeko Hotsak disketxearekin. Dikoko abesti guztiak joko dituzte Elgoibarren, hain zuzen ere, eta horrez gain, Rory Gallagher edota Eric Clapton bezalako musikarien bertsioak ere eskainiko dituzte. Eta sorpresaren bat ere egongo dela aurreratu zuen Aitor Badiolak, BARREN aldizkariari eskaini zion elkarrizketan.
 Bluestock taldeak eskainiko duen kontzertua 23:00etan hasiko da Kultur Etxeko sotoan, eta sarrerak hiru euro balio ditu. Elgoibarko Sinuose kolektiboak antolatutako kotzertua da.
 
 
 
 
Kultura Elgoibar